🌸 ပြည်သူ့လုံခြုံရေးအဖွဲ့ ဖွဲ့စည်းရာ၌ ပါဝင်ခြင်းမရှိဟု ရှမ်းပြည်နယ်လွှတ်တော်ကိုယ်စားလှယ် ရှင်းလင်း ပြောကြား

.

တောင်ကြီး၊ မေ ၁၂

.

ရှမ်းပြည်နယ်တောင်ပိုင်း၊ ညောင်ရွှေမြို့နယ်တွင် ပြည်သူ့လုံခြုံရေးအဖွဲ့ ဖွဲ့စည်းရာ၌ ပါဝင်ခြင်းမရှိကြောင်း မိုင်းပန်မြို့နယ် မဲဆန္ဒနယ် အမှတ် (၂) မှ ရှမ်းပြည်နယ်လွှတ်တော်ကိုယ်စားလှယ် စဝ်သာဦးက ပြန်လည် ရှင်းလင်းပြောဆိုခဲ့သည်ဟု သိရသည်။

.

.

ညောင်ရွှေမြို့၊ မြို့နယ်အထွေထွေအုပ်ချုပ်ရေးဦးစီးဌာန အစည်းအဝေးခန်းမတွင် ပြီးခဲ့သည့် ဧပြီလ ၂၇ ရက်က ပြုလုပ်ခဲ့သည့် ပြည်သူ့လုံခြုံရေးနှင့် အကြမ်းဖက်နှိမ်နှင်းရေး အဖွဲ့များအား စွမ်းရည်မြင့် မွမ်းမံ သင်တန်းဖွင့်ပွဲတွင် အခမ်းအနား တက်ရောက်ခဲ့ခြင်းသာဖြစ်ကြောင်း ၎င်းက ပြောသည်။

.

“ဒီအဖွဲ့က ဖွဲ့ထားတာ ကြာပါပြီ။ မြို့နယ်အုပ်ချုပ်ရေးမှူးက တာဝန်ခံပြီးတော့ ဖွဲ့တဲ့ အဖွဲ့ပါ။ မွမ်းမံသင်တန်း ပေးတဲ့အခါမှာ ကျွန်တော့်ကို လွှတ်တော်ကိုယ်စားလှယ်အနေနဲ့ ဖိတ်တာပါ။ ဒါကြောင့် အခမ်းအနား သွား တက်တာပါ။ ဒါကို ကျွန်တော်ကပဲ ခေါင်းဆောင်ပြီး ဖွဲ့လိုက်တဲ့အဖွဲ့ ဆိုတဲ့သဘောမျိုးနဲ့ ပုဂ္ဂိုလ်ရေးအရ ကော၊ ပါတီကိုကော တိုက်ခိုက်တာပါ” ဟု စဝ်သာဦးက ပြောဆိုထားသည်။

.

ပြည်နယ်လွှတ်တော်ကိုယ်စားလှယ် စဝ်သာဦးသည် ရှမ်းနှင့် တိုင်းရင်းသားများဒီမိုကရက်တစ်ပါတီ (SNDP) ကျားဖြူပါတီ ကိုယ်စားပြု၍ အချိုးကျကိုယ်စားပြုစနစ် အရ မိုင်းပန်မြို့နယ် မဲဆန္ဒနယ်အမှတ် (၂) ၏ ပြည်နယ်လွှတ်တော်ကိုယ်စားလှယ်အဖြစ် ရွေးကောက်တင်မြှောက်ခံထားရသူပြီး ညောင်ရွှေမြို့တွင် နေထိုင်သူဖြစ်သည့်အတွက် ညောင်ရွှေမြို့နယ်အတွင်း ပြုလုပ်သည့် အခမ်းအနားပွဲကို ဖိတ်စာရရှိသဖြင့် တက်ရောက်ခဲ့ခြင်းသာဖြစ်ကြောင်း သိရသည်။

.

အဆိုပါ ပြည်သူ့လုံခြုံရေးနှင့် အကြမ်းဖက်နှိမ်နှင်းရေး အဖွဲ့များအား စွမ်းရည်မြင့် မွမ်းမံသင်တန်းကို ညောင်ရွှေမြို့တွင် ဧပြီလ ၂၇ ရက်မှ မေလ ၂၄ ရက်အထိ ဖွင့်လှစ်ပို့ချပေးနေခြင်းဖြစ်ပြီး သင်တန်းသား ၅၈ ဦး တက်ရောက်လျက်ရှိကြောင်း သိရသည်။

.