ရှမ်းပြည်နယ်သတင်းများ
.
လားရှိုး၊ ဧပြီ ၂၅
.
ရှမ်းပြည်နယ်မြောက်ပိုင်း၊ လားရှိုးမြို့တွင်
ယမန်နေ့ ဧပြီလ ၂၄ ရက်က လွှတ်တော်ကိုယ်စားလှယ်များရုံးခန်း ဖွင့်လှစ်ခဲ့ကြောင်း
သိရသည်။
.
အဆိုပါ ရုံးခန်းတွင် အမျိုးသားလွှတ်တော် ကိုယ်စားလှယ်
ဒေါက်တာကျော်ထွန်း၊ ပြည်သူ့လွှတ်တော် ကိုယ်စားလှယ် ဒေါက်တာမျိုးထွန်း အပါအဝင်
ရှမ်းမြောက်ဒေသရှိ လွှတ်တော်ကိုယ်စားလှယ် စုစုပေါင်း ၁၁ ဦး
ရုံးထိုင်ဆောင်ရွက်သွားမည်ဖြစ်ကြောင်း သိရသည်။
.
ကလော၊ ဧပြီ ၂၅
.
ရှမ်းပြည်နယ်တောင်ပိုင်း၊ ကလောမြို့၊
မြို့တော်ခန်းမတွင် ယမန်နေ့ ဧပြီလ ၂၄ ရက်၊ မွန်းလွဲပိုင်းက လွှတ်တော်
ကိုယ်စားလှယ်များ၊ ဌာနဆိုင်ရာများ၊ မြို့မိမြို့ဖများ၊
ရပ်/ကျေးအုပ်ချုပ်ရေးမှူးများ တွေ့ဆုံပွဲ ပြုလုပ် ခဲ့ကြောင်း သိရသည်။
.
တွေ့ဆုံပွဲတွင် လွှတ်တော်ကိုယ်စားလှယ်များက
လွှတ်တော်အတွေ့အကြုံများ၊ လက်ရှိနိုင်ငံရေး အခင်း အကျင်းများ၊
အစိုးရသစ်ဖွဲ့စည်းမှုတို့နှင့် ပတ်သက်ပြီး တက်ရောက်လာသူများကို ရှင်းလင်းတင်ပြ
ခဲ့ကြောင်း သိရသည်။
.
လားရှိုး၊ ဧပြီ ၂၅
.
ရှမ်းပြည်နယ်မြောက်ပိုင်း၊ လားရှိုးမြို့တွင် ဧပြီလ
၂၁ ရက်က ကားပွဲစားတစ်ဦး အသတ်ခံရပြီး ကားလုယက်ခံရမှု ဖြစ်ပွားခဲ့ကြောင်း သိရသည်။
.
မော်တော်ယာဉ် ဝယ်ရောင်း ပြုလုပ်သည့် ကိုဆန်းအောင်သည်
ဧပြီလ ၂၁ ရက်၊ ညနေ ၄ နာရီခွဲခန့်က ကားဝယ်မည့် အမျိုးသား ၂ ဦးအား ကားသွားပြပြီးနောက်
အမျိုးသား ၂ ဦးက ကား စမ်းမောင်းမည်ဟု ဆိုသဖြင့် အတူ လိုက်ပါသွားခဲ့ပြီး ညနေ ၅ နာရီခန့်တွင်
ကိုဆန်းအောင်၏ ရုပ်အလောင်းကိုသာ ပြန်လည်တွေ့ရှိခဲ့ရခြင်းဖြစ်ကြောင်း သိရသည်။
.
တောင်ကြီး၊ ဧပြီ ၂၅
.
ရှမ်းပြည်နယ်တောင်ပိုင်း၊ တောင်ကြီးမြို့နယ်၊
ရွှေညောင်မြို့တွင် ယမန်နေ့ ဧပြီလ ၂၄ ရက်က စိုက်ပျိုးသူ တောင်သူများအား စိုက်ပျိုးရေးလုပ်ငန်းများတွင်
အသုံးပြုရန်အတွက် စက်သုံးဆီများကို လက်ဝယ်အရောက် ရောင်းချပေးခဲ့ကြောင်း သိရသည်။
.
ရွှေညောင်မြို့၊ သုခချမ်းသာရပ်ကွက်ရှိ
ရှမ်းပြည်နယ် ရေနံထွက်ပစ္စည်း ကြီးကြပ်စစ်ဆေးရေးရုံးတွင် ယမန်နေ့ ဧပြီလ ၂၄ ရက်၊
နံနက်ပိုင်းက တောင်ကြီးမြို့နယ်၊ မိုင်းသော်အရှေ့ကျေးရွာအုပ်စုအတွင်းရှိ ဧပြီလ
နွေစပါး စိုက် တောင်သူများအတွက် စက်သုံးဆီများကို ဖြန့်ဖြူးရောင်းချပေးခဲ့ခြင်းဖြစ်ကြောင်း
သိရသည်။
