🌸 တာချီလိတ်တွင် အမေများနေ့အကြို အမေ့မေတ္တာဘွဲ့တေးသီးချင်း ဖျော်ဖြေပွဲ ပြုလုပ်

.

တာချီလိတ်၊ မေ ၁၀

.

ရှမ်းပြည်နယ်အရှေ့ပိုင်း၊ တာချီလိတ်မြို့၊ ရန်အောင်မြေရပ်ကွက်၊ ပါလျှံ (၂) ရှိ တာ့ဟွာ တရုတ်ဘုံကျောင်း တွင် ယမန်နေ့ မေလ ၉ ရက်၊ ညပိုင်းက အမေများနေ့ အကြို အဖြစ် အမေ့မေတ္တာဘွဲ့ တေးသီချင်းများဖြင့် ဖျော်ဖြေပွဲအခမ်းအနား ပြုလုပ်ခဲ့ကြောင်း သိရသည်။

.

.

သားသမီးများအနေဖြင့် မိခင်များအပေါ် လေးစားတန်ဖိုးထားမှု ပိုမိုရှိလာ စေပြီး ကျေးဇူးဆပ်လိုစိတ်များ ဖြစ်ပေါ်လာစေရန်၊ လူမှုအသိုင်းအဝိုင်းအတွင်း မိသားစုတန်ဖိုးများကို ထိန်းသိမ်းမြှင့်တင်ရန်နှင့် မိခင်များ၏ အခန်းကဏ္ဍကို အများပြည်သူ သိမြင်လာစေရန်ရည်ရွယ်၍ အခမ်းအနားကို ကျင်းပခဲ့ခြင်းဖြစ်ကြောင်း သိရသည်။

.

ဖျော်ဖြေပွဲတွင် အာခါတိုင်းရင်းသားရေးရာဝန်ကြီး ဦးထွန်းအောင်က အဖွင့်အမှာစကားပြောကြားပြီး အမေ့ရင်ခွင်ကျောင်းတော်မှ ကျောင်းသား ကျောင်းသူလေးများက အမေ့မေတ္တာဘွဲ့ တေး သီချင်းများ၊ အာခါ၊ ရှမ်း၊ မြန်မာရိုးရာအကပဒေသာများနှင့် အာခါတိုင်းရင်းသားတို့၏ ပြဇာတ်‌တေးသရုပ်ဖော်များဖြင့် ဖျော်ဖြေတင်ဆက်ခဲ့ကြကြောင်း သိရသည်။

.

ထို့နောက် တာချီလိတ် ရွှေတိဂုံဂေါပကအဖွဲ့ ဥက္ကဌ ဦးဇော်မြင့်က အခမ်းအနားဖြစ်မြောက်ရေးအတွက် အလှူရှင်များကိုယ်စား ပံ့ပိုးကူညီရသည့် အကြောင်းကို ရှင်းလင်းပြောကြားပြီး ကျိုင်းတုံမြို့၊ အမေ့ရင်ခွင် ကျောင်း တည်ထောင်သူ ဦးမင်းညိုက အမေ့ရင်ခွင်တည်ထောင်ရခြင်းနှင့် ကျေးဇူးတင်စကား ပြောကြားခဲ့ကြောင်း သိရသည်။

.

အဆိုပါ ဖျော်ဖြေပွဲ အခမ်းအနားသို့  ရှမ်းပြည်နယ်အစိုးရအဖွဲ့ဝင် အာခါတိုင်းရင်းသားရေးရာဝန်ကြီး ဦးထွန်းအောင်၊ ပြည်သူ့လွတ်တော်ကိုယ်စားလှယ် ဦးကျော်ငြိမ်းအောင်နှင့် လွှတ်တော်ကိုယ်စားလှယ်များ၊ ဌာနဆိုင်ရာ တာဝန်ရှိသူများ၊ နိုင်ငံရေးပါတီများ၊ မြို့မိမြို့ဖများ၊ စီးပွားရေးလုပ်ငန်းရှင်များ၊ လူမှုရေး အသင်းအဖွဲ့များနှင့် ဖိတ်ကြားထားသော ဧည့်သည်တော်များ တက်ရောက်ခဲ့ကြောင်းသိရသည်။

.

ကမ္ဘာ့နိုင်ငံအသီးသီးတွင် အမေများနေ့ကို နှစ်စဉ် မေလ ဒုတိယပတ် တနင်္ဂနွေနေ၌ ကျင်းပလေ့ရှိပြီး တစ်နိုင်ငံနှင့်တစ်နိုင်ငံ အမေများနေ့ ကျင်းပသည့်ရက်များ မတူညီကြဘဲ မြန်မာနိုင်ငံတွင် ပြာသိုလပြည့်နေ့ ကို အမေများနေ့အဖြစ် သတ်မှတ်ထားသည်။

.

#KBZTai #Shan #Tachileik

.