🌸 တာချီလိတ်မြို့နယ်စာရေးဆရာအသင်း (၂၇) နှစ်ပြည့် နှစ်ပတ်လည်အခမ်းအနား ကျင်းပ

.

တာချီလိတ်၊ မေ ၁၇

.

ရှမ်းပြည်နယ်အရှေ့ပိုင်း၊ တာချီလိတ်မြို့နယ် စာရေးဆရာအသင်း၏ ဖွဲ့စည်းတည်ထောင်ခြင်း (၂၇) နှစ်ပြည့် အခမ်းအနားကို ယနေ့ မေလ ၁၇ ရက်၊ နံနက်ပိုင်းက တာချီလိတ်မြို့ရှိ ခရိုင်/မြို့နယ် စုပေါင်းရုံး၊ အစည်းအဝေးခန်းမတွင် ပြုလုပ်ခဲ့ကြောင်း သိရသည်။

.

.

အခမ်းအနားတွင် ခရိုင်စီမံခန့်ခွဲရေးနှင့် အုပ်ချုပ်ရေးကော်မတီဥက္ကဋ္ဌ ဦးတင့်ဝေသုံနှင့် တာဝန်ရှိသူများက အဖွင့်အမှာစကားပြောကြားပြီး မြို့နယ်စာရေးဆရာအသင်း နာယက ဦးဇော်နိုင်ဦး(ကိုသားကြီး)က အသင်းနှင့်ပတ်သက်သည့် လုပ်ငန်းဆိုင်ရာများအား ရှင်းလင်းပြောကြားခဲ့ကြောင်း သိရသည်။

.

ထို့နောက် တာချီလိတ်မြို့နယ်စာရေးဆရာအသင်း ဥက္ကဋ္ဌ ဦးလှဌေးက အသင်း၏ ၂၇ နှစ်တာ ဖြတ်သန်း ခဲ့သည့် လုပ်ငန်းဆောင်ရွက်မှုများ၊ အသင်းဖွဲ့စည်းဖြစ်ပေါ်လာပုံနှင့် ကျေးဇူးတင်စကား ပြောကြား ခဲ့ကြောင်း သိရသည်။

.

နှစ်ပတ်လည် အခမ်းအနားတွင် ရွှေတြိဂံမဂ္ဂဇင်း ၂၀၂၆ ခုနှစ် ထုတ်ဝေနိုင်ရေးနှင့် နှစ်စဉ် စဉ်ဆက်မပြတ် ဆက်လက်ထုတ်ဝေနိုင်ရေးအတွက် ငွေပဒေသာပင် မတည်လှူဒါန်းပေးကြသည့် မြို့မီးလင်းရေးဦးဆောင် ကော်မတီမှ တာဝန်ရှိသူများ၊ ရွှေတိဂုံစေတီဂေါကပအဖွဲ့ ဥက္ကဌ ဦးဇော်မြင့်နှင့် အလှူရှင်များအား ဂုဏ်ပြုမှတ်တမ်းလွှာများ အသီးသီးပေးအပ်ပြီး စုပေါင်းမှတ်တမ်းတင် ဓာတ်ပုံရိုက်ကူးခဲ့ကြောင်း သိရသည်။

.

တာချီလိတ်မြို့နယ် စာပေနှင့်စာနယ်ဇင်းအဖွဲ့ကို ၁၉၉၉ ခုနှစ် မေလ ၁၇ ရက်တွင် စတင်ဖွဲ့စည်းခဲ့ပြီး ၂၀၁၂ ခုနှစ်တွင် မြို့နယ်စာရေးဆရာအသင်းအဖြစ် ပြောင်းလဲဖွဲ့စည်းခဲ့ကာ အသင်းအနေဖြင့် စာပေလောက ဖွံ့ဖြိုးတိုးတက်ရေးနှင့် လူငယ်မျိုးဆက်များ စာပေအနုပညာအပေါ် စိတ်ဝင်စားလာစေရေးတို့ကို ရည်မှန်း၍ ဆောင်ရွက်လျက်ရှိကြောင်း သိရသည်။

.

#ShanGazette #Tachileik

.