🌸 တောင်ကြီးမြို့ရှိ ဘားဆိုင်တစ်ခုတွင် အမျိုးသမီးငယ်တစ်ဦး ဒဏ်ရာများဖြင့် သေဆုံးမှုဖြစ်ပွား

.

တောင်ကြီး၊ မေ ၅

.

တောင်ကြီးမြို့၊ ဗိုလ်ချုပ်အောင်ဆန်းလမ်း၊ ပြည်တော်သာရပ်ကွက်ရှိ Peter ဘားဆိုင်တွင် ယမန်နေ့ မေလ ၄ ရက်၊ ညပိုင်းက အမျိုးသမီးငယ်တစ်ဦး ဒဏ်ရာများဖြင့် သေဆုံးမှု ဖြစ်ပွားခဲ့ကြောင်း သိရသည်။

.

.

သေဆုံးသူမှာ ယင်းဘားဆိုင်တွင် ဝန်ထမ်းအဖြစ် လုပ်ကိုင်နေသည့် အသက် ၁၆ နှစ်အရွယ် မိန်းကလေး တစ်ဦးဖြစ်ပြီး မျက်နှာ၊ လက်နှင့် ဝမ်းဗိုက် တို့တွင် ညိုမဲဒဏ်ရာများဖြင့် သေဆုံးနေခြင်းဖြစ်ကြောင်း သိရသည်။

.

စုံစမ်းသိရှိချက်အရ ယမန်နေ့ မေလ ၄ ရက် ညပိုင်းက အဆိုပါ ဘားဆိုင်ပိုင်ရှင် အောင်မျိုးသူ (ခ) ပီတာ သည် သေဆုံးသူ အမျိုးသမီးငယ်အား စားသောက်ဆိုင်အတွင်း လာရောက်စားသောက်သည့် ဧည့်သည်မှ မုန့်ဖိုး ပေးအပ်ခဲ့သည်ကို ၎င်းအား ပြောပြမှုမရှိခြင်းကြောင့် ဟုဆိုကာ ထိုးကြိတ်၊ ရိုက်နှက် ညှဉ်းပန်းခြင်းများ ပြုလုပ်ခဲ့ရာမှ သေဆုံးသွားခဲ့ခြင်းဖြစ်ကြောင်း သိရသည်။

.

ကျူးလွန်သူ ဘားဆိုင်ပိုင်ရှင် အောင်မျိုးသူမှာ ယနေ့ မေလ ၅ ရက်၊ နံနက်ပိုင်းတွင် မော်တော်ဆိုင်ကယ်ဖြင့် ထွက်ခွာသွားသဖြင့် ၎င်းအား ဖမ်းဆီးရမိနိုင်ရေးအတွက် တာဝန်ရှိသူများက ဆောင်ရွက်လျက်ရှိကြောင်း သိရသည်။

.

#ShanGazette #Taunggyi #Crime

.