🌸 ယခုနှစ်တောင်ကြီးတန်ဆောင်တိုင်ပွဲတော် မီးပုံးပျံပြိုင်ပွဲတွင် ညလွှတ်မီးပုံးပျံအရေအတွက် ၈၀ ကျော် ပါဝင်လာနိုင်

.

တောင်ကြီး၊ အောက်တိုဘာ ၁၄

.

ယခု ၂၀၂၅ ခုနှစ်၊ တောင်ကြီးမြို့တော် တန်ဆောင်တိုင်ပွဲတော် မီးပုံးပျံပြိုင်ပွဲတွင် ပြိုင်ပွဲဝင် ညမီးကြီးနှင့် စိန်နားပန် မီးပုံးပျံ စုစုပေါင်း အလုံးရေ ၈၀ ကျော် ပါဝင်လာနိုင်ကြောင်း သိရသည်။

.

.

ထို့အပြင် ယခုနှစ်တွင် ယခင်နှစ်က ဝင်ရောက်ယှဉ်ပြိုင်ခွင့် မပြုခဲ့သည့် ယမ်းပိသာချိန် ၄၀ ပါဝင်သော ၂၅ ပေ အရွယ် ညမီးကြီးပြိုင်ပွဲဝင်မီးပုံးပျံများလည်း ပါဝင်လာမည်ဖြစ်ကြောင်းကြောင်း သိရသည်။

.

ပြီးခဲ့သည့် ၂၀၂၄ ခုနှစ်က ပြုလုပ်ခဲ့သည့် တောင်ကြီးတန်ဆောင်တိုင်ပွဲတော် မီးပုံးပျံပြိုင်ပွဲတွင် ပြိုင်ပွဲဝင် ညလွှတ်မီးပုံးပျံ စုစုပေါင်း ၄၇ သာ ပါဝင်လွှတ်တင်ခဲ့ရာ ယခုနှစ်တွင် ၂ ဆခန့် ပိုမိုများပြားလာခြင်း ဖြစ်ကြောင်း သိရသည်။

.

“မီးပုံးပျံတွေလည်း နှစ်ဆ တိုးလာတယ်။ ပွဲလာမယ့် ဧည့်သည်တွေလည်း နှစ်ဆ တိုးလာနိုင်တယ်။ အခုတောင် မြို့ထဲမှာ ဧည့်သည်တွေ တော်တော်များနေပြီ။ တစ်ဘက်မှာတော့ ဆိုင်ခန်းလေလံဈေး တွေလည်း နှစ်ဆလောက် တိုးသွားတယ် ကြားတယ်။ ပွဲထဲမှာ အစစအရာရာ ဈေးနှုန်းတွေလည်း နှစ်ဆလောက် ထပ်ပြီး တက်ဦးမယ့် သဘောပါပဲ” ဟု တောင်ကြီးဒေသခံတစ်ဦးက ၎င်း၏အမြင်ကို ပြောသည်။

.

ထို့အတူ နေ့လွတ်အရုပ်မီးပုံးပျံ ပြိုင်ပွဲဝင်များလည်း ယမန်နှစ်ထက် ပိုမိုများပြားနိုင်ပြီး နေ့လွှတ် ပြိုင်ပွဲဝင်အဖွဲ့များ အတွက် လွှတ်တင်ရမည့်ရက်ကို အောက်တိုဘာလ ၁၇ ရက်၊ နေ့လယ် ၁ နာရီတွင် ကန်ရှေ့ ရပ်ကွက်ရုံး၌ မဲနှိုက်သွားမည်ဖြစ်ကြောင်း သိရသည်။

.

ယခုနှစ် တောင်ကြီးမြို့တော် တန်ဆောင်တိုင်ပွဲတော် မီးပုံးပျံပြိုင်ပွဲကို တောင်ကြီးမြို့၊ အဝေရာမီးပုံးပျံကွင်း တွင် အောက်တိုဘာလ ၂၉ ရက်မှ နိုဝင်ဘာလ ၄ ရက်အထိ ကျင်းပပြုလုပ်သွားမည်ဖြစ်ပြီး ပွဲတော်ပိတ်ပွဲနှင့် ဆုပေးပွဲကို နိုဝင်ဘာလ ၅ ရက်တွင် ပြုလုပ်သွားမည်ဖြစ်ကြောင်း သိရသည်။

.

#ShanGazette #Taunggyi #Tazungdai

.