🌸 တောင်ကြီးမြို့၊ တောင်ကြားဆက်သွယ် ရွှေရည်အေးလမ်းတွင် လျှပ်စစ်မီးတိုင် တပ်ဆင်ပေးရန် ဒေသခံများ လိုလား

.

တောင်ကြီး၊ ဇန်နဝါရီ ၈

.

တောင်ကြီးမြို့ ဗိုလ်ချုပ်အောင်ဆန်းလမ်းနှင့် အနောက်မြို့ပတ်လမ်းတို့ကို ဆက်သွယ်ထားသည့် ရွှေရည်အေးလမ်း (တောင်ကြားလမ်း)တွင် ညပိုင်းအချိန် ဖြတ်သန်းသွားလာသူများ အန္တရာယ်ကင်းရှင်းစွာ သွားလာနိုင်ရန်အတွက် လျှပ်စစ်မီးတိုင်များ တပ်ဆင်ပေးရန်လိုအပ်နေကြောင်း ဒေသခံများထံက သိရသည်။

.

.

အဆိုပါရွှေရည်အေး တောင်ကြားလမ်းသည် စူဠာမုနိလောကချမ်းသာစေတီအနောက်ဘက်၊ ပြည်နယ်မီးသတ်ရုံးရှေ့မှ အနောက်မြို့ပတ်လမ်း၊ လန်ဒန်တိုက်လမ်းဆုံသို့ ဆက်သွယ်ဖောက်လုပ်ထားသည့် လမ်းဖြစ်ပြီး မြို့ပေါ်နေပြည်သူများ အသုံးပြုမှုများပြားသည့် လမ်းသွယ်တစ်ခုဖြစ်ကြောင်း သိရသည်။

.

“အရင်တုန်းက ဆိုလာမီးလုံးလေးတွေ တပ်ထားပေမဲ့ တချိူ့ဟာတွေက မလင်းတော့တာရှိတယ်။ နောက်ပြီး ဆိုလာမီးတွေက အလင်းရောင်အားနည်းတော့ သွားလာတဲ့အချိန် မှောင်တဲ့နေရာရောက်ရင် သတိထားပြီး သွားရတာပေါ့” ဟု ရွှေရည်အေးလမ်းမှ နေ့စဉ် အသွားပြန်ပြုလုပ်နေသူ ကျောင်းကြီးစုရပ်ကွက်နေ ဒေသခံ တစ်ဦးက ရှမ်းဂေဇက်သို့ ပြောသည်။

.

တောင်ကြီးမြို့တောင်ဘက်တွင် နေထိုင်သည့် အခြေခံလူတန်းစား အများစုသည် အလုပ်သိမ်းပြန်ချိန်များ တွင် ယင်းလမ်းသွယ်အား အသုံးပြုသွားလာနေကြရသည့်အတွက် ညပိုင်းတွင် ပြည်သူများ အဆင်ပြေစွာ သွားလာနိုင်ရန် လျှပ်စစ်လမ်းမီးတိုင်များ ပြောင်းလဲတပ်ဆင်ပေးရန် လိုအပ်နေခြင်းဖြစ်ကြောင်း သိရသည်။

.

“နေ့လယ်ဘက်တွေကတော့ သိပ်ပြဿနာမရှိဘူးပေါ့။ ညပိုင်းအလုပ်ပြန် မှောင်တဲ့အချိန်ဆိုရင် သတိထားပြီး သွားမှရတယ်။ လမ်းကွေ့လို‌ လူပြတ်တဲ့နေရာမျိုးဆိုရင် အမျိုးသမီးတွေအတွက် အန္တရာယ်ဖြစ်မှာ စိုးရိမ်ရ တာပေါ့။ လျှပ်စစ်မီးတပ်ပေးရင်တော့ ပိုကောင်းတာပေါ့” ဟု အခြား ဒေသခံတစ်ဦးကလည်း ၎င်း၏အမြင်ကို ပြောဆိုခဲ့သည်။

.

ယင်းရွှေရည်အေးလမ်းကြားတွင် ညပိုင်း အမှောင်ရိပ်ကျသည့်နေရာများ၌ လူအသွားအလာပြတ်သည့်အချိန် များတွင် လမ်းသွားလမ်းလာတချို့ထံမှ ငွေကြေးနှင့် လက်ဖုန်း လုယက်ခံရမှုများ ဖြစ်ပွားတတ်ကြောင်း သိရသည်။

.

#ShanGazette #Taunggyi

.