🌸 လားရှိုးတွင် ဘုန်းတော်ကြီးတစ်ပါး ဓါးခုတ်ခံရပြီး ပျံလွန်

.

လားရှိုး၊ ဇန်နဝါရီ ၂၈

.

ရှမ်းပြည်နယ်မြောက်ပိုင်း၊ လားရှိုးမြို့၊ ဗောဓာရုံဘုန်းတော်ကြီးကျောင်းတွင် ယနေ့ ဇန်နဝါရီလ ၂၈ ရက်၊ နံနက်ပိုင်းက သက်တော် ၅၆ နှစ် အရွယ် ဘုန်းတော်ကြီးတစ်ပါး ဓါးခုတ်ခံရပြီး ပျံလွန်တော်မူခဲ့ကြောင်း သိရသည်။

.

.

လားရှိုးမြို့၊ ရပ်ကွက် (၄)ရှိ ဗောဓာရုံဘုန်းတော်ကြီးကျောင်းတွင် သီတင်းသုံးနေသော ဆရာတော် ဦးကုသလ ကို ယနေ့ ဇန်နဝါရီလ ၂၈ ရက်၊ နံနက် ၆ နာရီခွဲခန့်က ၎င်းနေထိုင်သီတင်းသုံးသည့် အဆောင်လှေကားရင်း တွင် သွေးအိုင်အတွင်း လဲကျနေသည်ကို တွေ့ရှိခဲ့ရခြင်းဖြစ်ကြောင်း သိရသည်။

.

“ဒီမနက် ၆ နာရီခွဲလောက်က ဆရာတော် ဦးကုသလကို သူ့အဆောင်လှေကားအဆင်းမှာ ဓါးခုတ်ရာတွေနဲ့ သွေးအိုင်ထဲလဲနေတာတွေ့တယ်လို့ လက်ဘက်ရည်ဆိုင်က ကောင်လေးက ကျောင်းက ဆရာ‌တော်တွေကို သွားပြောတယ်။ သူတွေ့တဲ့အချိန်မှာ ဆရာတော် ဦးကုသလက စကားမေးလို့မရတော့ဘူး” ဟု လားရှိုးမြို့၊ ရပ်ကွက် (၄) နေ ဦးတင်အောင်က ပြောသည်။

.

သို့ဖြစ်၍ ဆရာတော်အား လားရှိုးပြည်သူ့ဆေးရုံကြီးသို့ ပို့ဆောင်ခဲ့သော်လည်း ပျံလွန်တော်မူခဲ့ပြီး ဖြစ်သည်ဟု သိရသည်။

.

အဆိုပါ ဆရာတော်အား ဓါးဖြင့်ခုတ်မှုနှင့် ပတ်သက်၍ ရဲတပ်ဖွဲ့က စစ်ဆေးလျက်ရှိပြီး လက်ရှိတွင် သံသယရှိသူ လူငယ်အချို့ကို ခေါ်ယူစစ်ဆေးနေဆဲဖြစ်ကြောင်း လားရှိုးမြို့မရဲစခန်းထံက သိရသည်။

.

လားရှိုးမြို့၊ ရပ်ကွက် (၄) ရှိ ဗောဓာရုံဘုန်းတော်ကြီးကျောင်း၏ အနောက်ဘက်တွင် ကျောင်းနေအရွယ် ကလေးများ အပြင် အခြေအနေမဲ့သူများ၊ မူးယစ်ဆေးသုံးစွဲသူများ လာရောက်တတ်လေ့ရှိပြီး မကြာခဏ ခိုက်ရန်ဖြစ်ပွားတတ်သဖြင့် ဆရာတော်က လူစုခွဲမောင်းထုတ်ရလေ့ရှိကြောင်းနှင့် တစ်ခါတရံတွင် လောက်လေးခွဖြင့် ခြောက်လှန့်ပစ်ခတ်ရခြင်းများလည်း ရှိကြောင်း ရပ်ကွက်နေ ပြည်သူများထံက သိရသည်။

.

အဆိုပါ ဓါးခုတ်မှုကြောင့် ပျံလွန်တော်မူခဲ့သည့် ဆရာတော် ဦးကုသလ၏ ရုပ်အလောင်းကို လားရှိုးမြို့၊ ရပ်ကွက် (၄) ရှိ ဗောဓာရုံဘုန်းတော်ကြီးကျောင်းတိုက် အရှေ့မြေကွက်လပ်တွင် ပင့်ဆောင်ပူဇော်ထားပြီး မျက်နှာမှာ ဒဏ်ရာများကြောင့် အမြင်မသင့်သဖြင့် သင်္ကန်းဖြင့် ဖုံးအုပ်ထားကြောင်း သိရသည်။

.

ပျံတော်မူသည့် ဆရာတော်ဦးကုသလမှာ ဓမ္မာစရိယ စာတတ် စာချဆရာတော်တပါးဖြစ်ပြီး မိုးကုတ်ဝိပဿနာတရားစဉ်နှင့် လုပ်ငန်းစဉ် ပြန့်ပွားရေးအတွက် လုပ်ဆောင်နေသူ ဆရာတော်တစ်ပါး ဖြစ်ကြောင်း သိရသည်။

.

#ShanGazette #Lashio #Crime

.