🌸 ရှမ်းယူနိုက်တက် ကစားသမား ရဲမင်းသူကို ၅ ပွဲပယ် ပြစ်ဒဏ်နှင့် ဒဏ်ကြေးငွေ ၁၀ သိန်းကျပ် ချမှတ်

.

တောင်ကြီး၊ ဖေဖော်ဝါရီ ၂၅

.

ရှမ်းယူနိုက်တက်အသင်းမှ ကျောနံပတ် ၃ ကစားသမား ရဲမင်းသူအား မြန်မာနေရှင်နယ်လိဂ် ပြိုင်ပွဲများတွင် အနီးဆုံး ၅ ပွဲပယ် ပြစ်ဒဏ်နှင့် ဒဏ်ကြေးငွေ ၁၀ သိန်းကျပ် ပေးဆောင်ရန် ချမှတ်ခဲ့ကြောင်း သိရသည်။

.

.

မြန်မာနေရှင်နယ်လိဂ် ပွဲစဉ်များအနက် ဖေဖော်ဝါရီလ ၂၀ ရက်က YUSC ကွင်းတွင် ကျင်းပခဲ့သည့် ပွဲစဉ် အမှတ် (၁၀၇)၊ ရန်ကုန်ယူနိုက်တက်အသင်းနှင့် ရှမ်းယူတိုက်တက်အသင်းတို့ ပွဲစဉ်မှ ဖြစ်ပွားခဲ့သည့် ဖြစ်စဉ်များအတွက် ယင်းကဲ့သို့ ဆုံးဖြတ်ခဲ့ခြင်းဖြစ်ကြောင်း စည်းကမ်းထိန်းသိမ်းရေးနှင့် ကျင့်ဝတ်ကော်မီက ယမန်နေ့ ဖေဖော်ဝါရီ ၂၄ ရက်တွင် ထုတ်ပြန်ထားသည်။

.

မြန်မာနိုင်ငံဘောလုံးအဖွဲ့ချုပ်၊ စည်းကမ်းထိန်းသိမ်းရေးနှင့် ကျင့်ဝတ်ကော်မတီသည် ပွဲစဉ် ရုပ်သံမှတ်တမ်းများအား ပြန်လည်ကြည့်ရှုခြင်း၊ ပြိုင်ပွဲကြီးကြပ်နှင့် ဒိုင်လူကြီးများ၏ အစီရင်ခံစာများအား အကြိမ်ကြိမ်သုံးသပ်ဖတ်ရှုလေ့လာခြင်းများ ပြုလုပ်ကာ ယင်းကဲ့သို့ ဆုံးဖြတ်ချက် ချမှတ်ခဲ့ခြင်း ဖြစ်ကြောင်း သိရသည်။

.

အဆိုပါပွဲစဉ်၏ ပွဲကစားချိန် ၈၇ မိနစ်တွင် ရှမ်းယူနိုက်တက်အသင်းမှ ကျောနံပါတ် ၃ ရဲမင်းသူသည် ရန်ကုန် ယူနိုက်တက်အသင်း ကစားသမား ကျောနံပါတ် ၉ မိုဂူးအား ခြေထောက်ကျိုးစေပြီး ကစားသမားဘဝမှ အနားယူရနိုင်သည်အထိ ကြမ်းတမ်းစွာ ဖျက်ထုတ်ကစားခဲ့ခြင်းကြောင့် ရဲမင်းသူအား MNL I & II League 2025-26 Regulations စည်းကမ်းထိန်းသိမ်းရေးမူ အပိုဒ် (၄) နှင့် (၁၈)တို့အရ မြန်မာနေရှင်နယ်လိဂ် ပြိုင်ပွဲများတွင် အနီးစပ်ဆုံး ၅ ပွဲ ပါဝင်ကစားခွင့် မပြုရန်နှင့် ဒဏ်ကြေးငွေကျပ် ၁၀ သိန်းပေးဆောင်ရန် ချမှတ်ခဲ့ခြင်းဖြစ်ကြောင်း သိရသည်။

.

ထို့အပြင် နှစ်ဖက်အသင်းမှ အုပ်ချုပ်/နည်းပြနှင့် အရန်ကစားသမားများသည် ပွဲကစားနေချိန်အတွင်း နည်းစနစ်ဧရိယာအတွင်း လိုအပ်သည့်အရေအတွက်ထက် ပိုမို၍နေခြင်း၊ အော်ဟစ်ခြင်း၊ ကစားကွင်း အတွင်းသို့ ဝင်ရောက်ခြင်း၊ တစ်ဖက်အသင်း၏ နည်းစနစ်ဧရိယာထဲသို့ သွားရောက်စောဒက တက်ခြင်းများ မပြုလုပ်ရန်နှင့် ထပ်မံကစားမည့် ပွဲစဉ်များတွင် ပြိုင်ပွဲဥပဒေနှင့်အညီ နေထိုင်သွားရန် နောက်ဆုံးအကြိမ် အဖြစ် သတိပေး ထုတ်ပြန်ခဲ့ကြောင်း သိရသည်။

.

ယင်းအပြင် ကွင်းလယ်ဒိုင်လူကြီးအနေဖြင့် အချို့သော ကစားသမားများ၏ ဥပဒေပ ကစားပုံအချို့ကို ဥပဒေနှင့်အညီ စောလျင်စွာ အရေးယူဆောင်ရွက်ခြင်းမပြုသဖြင့် မလိုလားအပ်သော ဆင့်ကဲဖြစ်စဉ်များ ဖြစ်ပွားခဲ့ကြောင်း သုံးသပ်တွေ့ရှိရ၍ ဒိုင်ကော်မတီမှ လိုအပ်သည့် အရေးယူဆောင်ရွက်မှုများ ပြုလုပ်ပြီး စည်းကမ်းထိန်းသိမ်းရေးနှင့် ကျင့်ဝတ်ကော်မတီသို့ ပြန်လည်တင်ပြသွားရန် ဆုံးဖြတ်ခဲ့ကြောင်း သိရသည်။

.

အဆိုပါပွဲစဉ်တွင် ရန်ကုန်ယူနိုက်တက်အသင်းနှင့် ရှမ်းယူနိုက်တက်အသင်းတို့သည် တစ်ဘက်နှင့်တစ်ဘက် ဂိုးမသွင်းနိုင်ဘဲ ဂိုးမရှိ သရေဖြင့် ပွဲပြီးဆုံးခဲ့သည်။

.

#ShanGazette #Sports #Football #MNL

.