🌸 “ဝ” တောင်ပိုင်း မူးယစ်တိုက်ဖျက်ရေးတပ်ဖွဲ့က ဖမ်းဆီးရမိသည့် မူးယစ်ဆေးဝါးနှင့် တရားခံများကို အစိုးရထံ လွှဲပြောင်း

.

တောင်ကြီး၊ ဖေဖော်ဝါရီ ၂၅

.

“ဝ” တောင်ပိုင်း မူးယစ်ဆေးဝါးတိုက်ဖျက်ရေးတပ်ဖွဲ့က ဖမ်းဆီးရမိခဲ့သည့် မူးယစ်ဆေးဝါးများနှင့် တရားခံ များကို ယမန်နေ့ ဖေဖော်ဝါရီလ ၂၄ ရက်က မိုင်းတုံမြို့နယ်၊ ဟွေအောဒေသတွင် သက်ဆိုင်ရာ အစိုးရ တာဝန်ရှိသူများထံ (၂၅) ကြိမ်မြောက်အဖြစ် လွှဲပြောင်းပေးအပ်ခဲ့ကြောင်း သိရသည်။

.

.

“ဝ” တောင်ပိုင်း စစ်ဒေသ (၁၇၁) သည် ဖေဖော်ဝါရီလ ၁၅ ရက်၊ နေ့လယ်ပိုင်းက ဘိန်းဖြူ ၁၆၁ စုံ၊ စုစုပေါင်း ၁၂၀ ဒသမ ၇၅ ကီလိုဂရမ်နှင့် မူးယစ်ဆေးဝါး မှောင်ခိုသမား ၂ ဦးကို မော်တော်ဆိုင်ကယ် ၂ စီးနှင့်အတူ ဖမ်းဆီးရမိခဲ့ခြင်းဖြစ်ကြောင်း သိရသည်။

.

ဆက်လက်ပြီး ဖမ်းဆီးရမိသူများ၏ ဝန်ခံချက်အရ အစိုးရဌာနများနှင့် ဆက်သွယ်ညှိနှိုင်းပြီး ပူးပေါင်း ဆောင်ရွက်မှုဖြင့် ယင်းနေ့ည ၁၁ နာရီခွဲ ခန့်တွင် မက်သာဖက်တမင်း ၄၉၄ ကီလိုဂရမ်၊ မူးယစ်ဆေးဝါး ရောင်းဝယ်ရာတွင် အသုံးပြုသည့် မော်တော်ယာဉ် ၁ စီး၊ မော်တော်ဆိုင်ကယ် ၂ စီး၊ အမဲလိုက် ရိုင်ဖယ် ၁ လက်၊ မိုဘိုင်းဖုန်း ၁ လုံးနှင့် မြန်မာနိုင်ငံသား မှတ်ပုံတင်ကတ် ၄ ကတ်တို့ကို ထပ်မံသိမ်းဆည်းရမိခဲ့ကြောင်း သိရသည်။

.

အဆိုပါ ဖမ်းဆီးရမိ မူးယစ်ဆေးဝါးများနှင့် တရားခံများကို အစိုးရဌာနများနှင့် ညှိနှိုင်းပြီးနောက် ယမန်နေ့ ဖေဖော်ဝါရီလ ၂၄ ရက်တွင် အခမ်းအနားဖြင့် ပြန်လည်လွှဲပြောင်းပေးအပ်ခဲ့ခြင်းဖြစ်ကြောင်း သိရသည်။

.

မူးယစ်ဆေးဝါး မှောင်ခိုသမားများ အုပ်စုတစ်စုသည် “ဝ” တောင်ပိုင်းဒေသဘက်သို့ ထွက်ပြေးသွားကြောင်း ဖေဖော်ဝါရီလ ၄ ရက်နေ့မှစ၍ သက်ဆိုင်ရာဌာနများက အကြောင်းကြားလာခဲ့ပြီး စုံစမ်းစစ်ဆေးမှုတွင် အကူအညီတောင်းခံလာခဲ့သည့်အတွက် မြန်မာ-ထိုင်းနယ်စပ်တစ်လျှောက် ကင်းလှည့်မှုနှင့် ထိန်းချုပ်မှု များကို အားကောင်းစေရန် တပ်ဖွဲ့များကို ချက်ချင်းစေလွှတ်ခဲ့ပြီး တင်းကျပ်သော စစ်ဆေးရေးနှင့် ကာကွယ်ရေးအတွက် စစ်ဆေးရေးဂိတ်များကို လုပ်ဆောင်ခဲ့ရာ ယခု မူးယစ်ဆေးဝါးများကို ဖမ်းဆီးရမိ ခဲ့ခြင်းဖြစ်ကြောင်း သိရသည်။

.

“ဝ” တောင်ပိုင်း ဒေသသည် မြန်မာ-ထိုင်းနယ်စပ်တွင် တည်ရှိပြီး ရှုပ်ထွေးသော မြေမျက်နှာသွင်ပြင်နှင့် မတူကွဲပြားသော လူမျိုးစုများရှိပြီး ကွဲပြားသော အုပ်စုများရှိနေခြင်းကြောင့် ပိုမိုရှုပ်ထွေးလာကာ မူးယစ်ဆေးဝါး တိုက်ဖျက်ရေးလုပ်ငန်းပိုမို အခက်အခဲ ဖြစ်ပေါ်စေကြောင်း “ဝ” တောင်ပိုင်းက ထုတ်ပြန် ထားသည်။

.

#ShanGazette #MongTong #UWSA

.