🌸 တောင်ကြီးတွင် လျှပ်စစ်မီတာခများ သုံးဆကျော် မြင့်တက်လာ

.

တောင်ကြီး၊ ဖေဖော်ဝါရီ ၂၀

.

ရှမ်းပြည်နယ်မြို့တော် တောင်ကြီးမြို့တွင် ယခုရက်ပိုင်းအတွင်း ဖြန့်ဝေနေသော ဇန်နဝါရီလအတွက် ကောက်ခံသည့် လျှပ်စစ်မီတာ စာရွက်များ၌ ဓါတ်အားကောက်ခံမှု ကျသင့်ငွေများ ၃ ဆကျော်အထိ မြင့်တက်လာနေကြောင်း သိရသည်။

.

.

ယခင်လများက လျှပ်စစ်မီတာခ ၁၀၀၀၀ ကျပ်ဝန်းကျင်ခန့် ကျသင့်သည့် လူနေအိမ်များတွင် ယခုရက်‌ပိုင်း ရောက်ရှိလာသည့် လျှပ်စစ်ဓာတ်အားခ တောင်းခံလွှာ စာရွက်များ၌ ၅၀၀၀၀ ကျပ် ဝန်းကျင် အထိ ကျသင့် နေခြင်းဖြစ်ကြောင်း သိရသည်။

.

“ဒီနေ့မနက်ပိုင်း မီတာစာရွက်လာပို့တော့ မီတာခ က တော်တော်များနေတာ တွေ့ရတယ်။ အရင်လ တွေတုန်းက ပုံမှန် တစ်သောင်းလောက်ပဲ ကျတာကို အခု စာရွက်ရောက်လာတော့ ငါးသောင်းလောက် ဖြစ်နေတယ်” ဟု ‌တောင်ကြီးမြို့၊ ချမ်းသာရပ်ကွက်‌နေ ဒေသခံတစ်ဦးက ရှမ်းဂေဇက်သို့ ပြောသည်။

.

ယခု ရက်ပိုင်းတွင် အဆိုပါရပ်ကွက်အတွင်းသို့ ဖြန့်ဝေထားသည့် မီတာစာရွက် အများစု၌ ယင်းကဲ့သို့ ဓါတ်အားခများ အဆမတန် မြင့်တက်နေခြင်းဖြစ်ကြောင်း ဒေသခံများက ပြောဆိုကြသည်။

.

ယခုနှစ်တွင် လျှပ်စစ်မီး ပြတ်တောက်မှု နည်းပါးသော်လည်း ယခုကဲ့သို့ မီတာခ ကောက်ခံမှု အဆမတန် မြင့်တက်လာသည့်အတွက် အခြေခံလူတန်းစား ပြည်သူများ အခက်အခဲ ဖြစ်ပေါ်နေရပြီး သုံးစွဲမှုအပေါ် မူတည်၍ ဓါတ်အားခများ မြင့်တက်လာနိုင်သည့်အတွက် သတိပြုရန် လိုအပ်ကြောင်း ဒေသခံများက ပြောဆိုကြသည်။

.

လက်ရှိ ကောက်ခံနေသည့် အိမ်သုံး လျှပ်စစ်မီတာခ နှုန်းထားများမှာ လျှပ်စစ်မီတာ ၁ ယူနစ်မှ ၅၀ ယူနစ် အထိ ၅၀ ကျပ်၊ ၅၁ ယူနစ်မှ ၁၀၀ ယူနစ်အထိ ၁၀၀ ကျပ်၊ ၁၀၁ ယူနစ်မှ ၂၀၀ ယူနစ်အထိ ၁၅၀ ကျပ် နှင့် ၂၀၁ ယူနစ်အထက် ၃၀၀ ကျပ်တို့ဖြစ်ကြောင်း သိရသည်။

.

#ShanGazette #Taunggyi

.