🌸 မဲခေါင်မြစ် ရေနက်စီးကြောင်း တူးဖော်ခြင်းလုပ်ငန်း ပြီးစီးမှုအခြေအနေ မြန်မာ-လာအို ဆွေးနွေး

.

တာချီလိတ်၊ ဇွန် ၉

.

မဲခေါင်မြစ် ရေနက်စီးကြောင်း ပြန်လည်တူးဖော်ခြင်းလုပ်ငန်း ဆောင်ရွက်ပြီးစီးမှု အခြေအနေများကို ယနေ့ ဇွန်လ ၉ ရက်၊ နံနက်ပိုင်းက တာချီလိတ်မြို့၊ ဝမ်ကောင်းရပ်ကွက်ရှိ ဇန်းမွန်အာခါဟိုတယ်တွင် မြန်မာ-လာအို  နှစ်နိုင်ငံ ပူးတွဲနည်းပညာအဖွဲ့ တွေ့ဆုံဆွေးနွေးခဲ့ကြောင်း သိရသည်။

.

.

အစည်းအဝေးတွင် နှစ်နိုင်ငံကိုယ်စားလှယ်များက မဲခေါင်မြစ်အတွင်း နယ်နမိတ်အမှတ် (၂) နှင့် (၇) အကြား မြန်မာဘက်ခြမ်း၌ ဆောင်ရွက်ခဲ့သည့် မူလရေနက်စီးကြောင်း ပြန်လည်တူးဖော်ခြင်းလုပ်ငန်း၏ ပြီးစီးမှု အခြေအနေ၊ လုပ်ငန်းဆောင်ရွက်ခဲ့မှု ရလဒ်များနှင့် အနာဂတ်ပူးပေါင်းဆောင်ရွက်နိုင်မည့် ကိစ္စရပ်များအား အပြန်အလှန်ဆွေးနွေးခဲ့ကြကြောင်း သိရသည်။

.

ထိုနောက် နှစ်နိုင်ငံကိုယ်စားလှယ်များက မူလ ရေနက်စီးကြောင်း ပြန်လည်တူးဖော်ခြင်းလုပ်ငန်း အောင်မြင် စွာ ပြီးစီးခဲ့ခြင်းနှင့် စပ်လျဉ်း၍ သဘောတူညီခြင်း အသိအမှတ်ပြုစာ (Certificate of Acknowledgement) အား လက်မှတ်ရေးထိုးခဲ့ကြကြောင်း သိရသည်။

.

အစည်းအဝေးသို့ လာအိုပြည်သူ့ဒီမိုကရက်တစ်သမ္မတနိုင်ငံ နိုင်ငံခြားရေးဝန်ကြီးဌာန၊ အမျိုးသားနယ်နမိတ် ကော်မတီရုံး ဒုတိယညွှန်ကြားရေးမှူးချုပ် Mr. Senglasy THESTHANY ဦးဆောင်သော ကိုယ်စားလှယ် အဖွဲ့ဝင် ၁၁ ဦးနှင့် မြန်မာနိုင်ငံ ရေအရင်းအမြစ်နှင့် မြစ်ချောင်းများ ဖွံဖြိုးတိုးတက်ရေး ဦးစီးဌာန ညွှန်ကြားရေးမှူးချုပ် ဦးအောင်မျိုးခိုင် ဦးဆောင်သော မြန်မာကိုယ်စားလှယ်အဖွဲ့ဝင် ၉ ဦးတို့ တက်ရောက် ဆွေးနွေးခဲ့ကြောင်း သိရသည်။

.

အဆိုပါ လုပ်ငန်းဆောင်ရွက်မှုသည် မြန်မာ-လာအို နှစ်နိုင်ငံအကြား ချစ်ကြည်ရင်းနှီးမှုနှင့် နည်းပညာ ပူးပေါင်းဆောင်ရွက်မှုကို ပိုမိုခိုင်မာစေသည့်အပြင် မဲခေါင်မြစ်၏ ရေကြောင်းသွားလာရေး လုံခြုံချောမွေ့ရေး နှင့် ဒေသတွင်း စီးပွားရေးဖွံဖြိုးတိုးတက်ရေး အတွက် အရေးပါသော အခြေခံအုတ်မြစ်တစ်ရပ် ဖြစ်လာမည် ဖြစ်ကြောင်း သိရသည်။       

.

#ShanGazette #Tachileik

.