🌸 အောင်ပန်းတွင် ထရန်စဖော်မာမှ ကြေးကြိုး ခိုးယူသည့်အမျိုးသား ဓာတ်လိုက်သေဆုံး

.

အောင်ပန်း၊ ဇွန် ၁၀

.

ရှမ်းပြည်နယ်တောင်ပိုင်း၊ ကလောမြို့နယ်၊ အောင်ပန်းမြို့တွင် ယမန်နေ့ ဇွန်လ ၉ ရက်၊ ညနေပိုင်းက လျှပ်စစ် ထရန်စဖော်မာမှ မိုးကြိုးလွှဲ ကြေးကြိုးအား ဖြတ်တောက်ခိုးယူသည့် အမျိုးသား တစ်ဦး ဓာတ်လိုက်သေဆုံးမှု ဖြစ်ပွားခဲ့ကြောင်း သိရသည်။

.

.

အောင်ပန်းမြို့၊ ရွာသစ်ရပ်ကွက်၊ ပစ္စုပ္ပန်ဘုန်းကြီးကျောင်းဝင်းအတွင်းရှိ ထရန်စဖော်မာတွင် ယနေ့ ဇွန်လ ၉ ရက်၊ ညပိုင်းက အမျိုးသားတစ်ဦး မီးတာပုံးများ ထားသော ထရန်စဖော်မာ ပေါ်ရှိ မိုးကြိုးလွှဲ ကြေးကြိုးအား ပလာယာဖြင့် ဖြတ်တောက်စဉ် ဓာတ်လိုက်သေဆုံးနေကြောင်း သတင်းအရ ရဲတပ်ဖွဲ့က သွားရောက် စစ်ဆေးရာ သေဆုံးသူမှာ အောင်ပန်းမြို့၊ အမှတ် (၃) ရပ်ကွက်နေ အသက် ၂၄ နှစ်အရွယ် လူငယ် အမျိုးသားဖြစ်ပြီး ခန္ဓာကိုယ် မီးလောင်ကျွမ်း၊ ညိုမည်းဒဏ်ရာများဖြင့် ဓာတ်လိုက် သေဆုံးနေသည်ကို တွေ့ရှိခဲ့ခြင်းဖြစ်ကြောင်း သိရသည်။

🌸 မဲခေါင်မြစ် ရေနက်စီးကြောင်း တူးဖော်ခြင်းလုပ်ငန်း ပြီးစီးမှုအခြေအနေ မြန်မာ-လာအို ဆွေးနွေး

.

တာချီလိတ်၊ ဇွန် ၉

.

မဲခေါင်မြစ် ရေနက်စီးကြောင်း ပြန်လည်တူးဖော်ခြင်းလုပ်ငန်း ဆောင်ရွက်ပြီးစီးမှု အခြေအနေများကို ယနေ့ ဇွန်လ ၉ ရက်၊ နံနက်ပိုင်းက တာချီလိတ်မြို့၊ ဝမ်ကောင်းရပ်ကွက်ရှိ ဇန်းမွန်အာခါဟိုတယ်တွင် မြန်မာ-လာအို  နှစ်နိုင်ငံ ပူးတွဲနည်းပညာအဖွဲ့ တွေ့ဆုံဆွေးနွေးခဲ့ကြောင်း သိရသည်။

.

.

အစည်းအဝေးတွင် နှစ်နိုင်ငံကိုယ်စားလှယ်များက မဲခေါင်မြစ်အတွင်း နယ်နမိတ်အမှတ် (၂) နှင့် (၇) အကြား မြန်မာဘက်ခြမ်း၌ ဆောင်ရွက်ခဲ့သည့် မူလရေနက်စီးကြောင်း ပြန်လည်တူးဖော်ခြင်းလုပ်ငန်း၏ ပြီးစီးမှု အခြေအနေ၊ လုပ်ငန်းဆောင်ရွက်ခဲ့မှု ရလဒ်များနှင့် အနာဂတ်ပူးပေါင်းဆောင်ရွက်နိုင်မည့် ကိစ္စရပ်များအား အပြန်အလှန်ဆွေးနွေးခဲ့ကြကြောင်း သိရသည်။

🌸 ရှမ်းပြည်နယ်အတွင်းရှိ လိုင်စင်မဲ့ယာဉ်များအား မှတ်ပုံတင်ဆောင်ရွက်ပေး၍ မရကြောင်း ပြည်နယ် ဝန်ကြီး ပြောကြား

.

တောင်ကြီး၊ ဇွန် ၉

.

ရှမ်းပြည်နယ်အတွင်းရှိ လိုင်စင်မဲ့ မော်တော်ယာဉ်နှင့် မော်တော်ဆိုင်ကယ်များအား မှတ်ပုံတင် ဆောင်ရွက် ပေး၍ မရနိုင်ကြောင်း ရှမ်းပြည်နယ်အစိုးရအဖွဲ့ဝင် လျှပ်စစ်၊ စွမ်းအင်၊ စက်မှုနှင့် လမ်းပန်းဆက်သွယ်ရေး ဝန်ကြီး ခွန်သန်းထူးက လွှတ်တော်တွင် ပြောကြားခဲ့သည်ဟု သိရသည်။

.

.

တတိယအကြိမ် ရှမ်းပြည်နယ်လွှတ်တော် ဒုတိယပုံမှန် အစည်းအဝေး ပထမနေ့ကို ယနေ့ ဇွန်လ ၉ ရက်၊ နံနက်ပိုင်းက တောင်ကြီးမြို့၊ ရှမ်းပြည်နယ်လွှတ်တော်ရုံး အစည်းအဝေးခန်းမတွင် ကျင်းပရာ လွှတ်တော် အစည်းဝေးတွင် ရပ်စောက်မြို့နယ် မဲဆန္ဒနယ်အမှတ် (၁) မှ ပြည်နယ်လွှတ်တော်ကိုယ်စားလှယ် ဦးအောင်ကျော်ညွန့်၏ ကြယ်ပွင့်ပြမေးခွန်း မေးမြန်းမှုကို ပြည်နယ်ဝန်ကြီးက ယင်းကဲ့သို့ ပြန်လည်ဖြေကြား ခဲ့ခြင်းဖြစ်ကြောင်း သိရသည်။

🌸 ရှမ်းပြည်နယ်လွှတ်တော် ဒုတိယပုံမှန်အစည်းအဝေး စတင်ကျင်းပ

.

တောင်ကြီး၊ ဇွန် ၉

.

တတိယအကြိမ် ရှမ်းပြည်နယ်လွှတ်တော်၊ ဒုတိယပုံမှန်အစည်းအဝေး ပထမနေ့ကို ယနေ့ ဇွန်လ ၉ ရက်၊ နံနက် ၁၀ နာရီက တောင်ကြီးမြို့၊ ရှမ်းပြည်နယ်လွှတ်တော် အစည်းအဝေးခန်းမ၌ စတင် ပြုလုပ်လျက် ရှိကြောင်း သိရသည်။

.

.

အစည်းအဝေးတွင် ရှမ်းပြည်နယ် လွှတ်တော်ကိုယ်စားလှယ် ၁၀ ဦးတို့က ကြယ်ပွင့်ပြမေးခွန်း ၁၈ ခု လွှတ်တော်သို့ မေးမြန်းသွားမည်ဖြစ်ပြီး သက်ဆိုင်ရာ ပြည်နယ်အဆင့် အဖွဲ့အစည်းဝင် ပုဂ္ဂိုလ်များက ပြန်လည် ဖြေကြားသွားမည် ဖြစ်ကြောင်း သိရသည်။

.

🌸 တောင်ကြီးတွင် လမင်းစီမံချက်ဖြင့် နိုင်ငံသားစိစစ်ရေးကတ်ပြားနှင့် UID များ ထုတ်ပေး

.

တောင်ကြီး၊ ဇွန် ၈

.

ရှမ်းပြည်နယ်မြို့တော်၊ တောင်ကြီးမြို့၊ အမှတ် (၁) အခြေခံပညာအထက်တန်းကျောင်းတွင် ယနေ့ ဇွန်လ ၈ ရက်၊ နံနက်ပိုင်းက ကျောင်းသား/သူများအား နိုင်ငံသားစိစစ်ရေးကတ်ပြားနှင့် UID ထုတ်ပေးခြင်း လုပ်ငန်းများကို လမင်းစီမံချက် ဖြင့် ဆောင်ရွက်ပေးခဲ့ကြောင်း သိရသည်။

.

.

ထိုသို့ ဆောင်ရွက်ပေးရာတွင် လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ တောင်ကြီးမြို့နယ် ဦးစီးမှူးရုံးက အသက် ၁၀ နှစ်အထက် နိုင်ငံသားစိစစ်ရေးကတ်ပြား မရှိသေးသည့် ကျောင်းသား/သူများကို နိုင်ငံသားစိစစ်ရေးကတ်ပြားများ ပြုလုပ်ပေးခဲ့ပြီး မြို့နယ်အလိုက် သက်ဆိုင်ရာ ကျောင်းများတွင် ဆောင်ရွက် ပေးနေခြင်းဖြစ်ကြောင်း သိရသည်။

🌸 လားရှိုးတွင် လက်ကိုင်ဖုန်း ၂ လုံး ခိုးယူလာသူကို ဖမ်းမိ

.

လားရှိုး၊ ဇွန် ၈

.

ရှမ်းပြည်နယ်မြောက်ပိုင်း၊ လားရှိုးမြို့တွင် ယမန်နေ့ ဇွန်လ ၇ ရက်၊ နံနက်အစောပိုင်းက လက်ကိုင်ဖုန်း ၂ လုံး ခိုးယူလာသူတစ်ဦးကို ဖမ်းဆီးရမိခဲ့ကြောင်း သိရသည်။

.

.

လားရှိုးခရိုင်ရဲတပ်ဖွဲ့မှူးရုံး၊ မှုခင်းနှိမ်နင်းရေးဌာနစိတ်မှ ရဲတပ်ဖွဲ့ဝင်များ ပါဝင်သော ပူးပေါင်းအဖွဲ့သည် ယမန်နေ့ ဇွန်လ ၇ ရက်၊ နံနက် ၃ နာရီခန့်က လုံခြုံရေး လှဉ့်ကင်းဆောင်ရွက်နေစဉ် လားရှိုးမြို့၊ ရပ်ကွက် (၈)၊ သိန္နီလမ်းမပေါ်တွင် မသင်္ကာဖွယ် လမ်းလျှောက်လာသူတစ်ဦးအား ရှာဖွေစစ်ဆေးခဲ့ခြင်းဖြစ်ကြောင်း သိရသည်။

🌸 ရွှေညောင်တွင် နေအိမ်မီးလောင်မှုဖြစ်ပွား

.

ရွှေညောင်၊ ဇွန် ၇

.

ရှမ်းပြည်နယ်တောင်ပိုင်း၊ တောင်ကြီးမြို့နယ်၊ ရွှေညောင်မြို့၊ ရွှေဘုံသာရပ်ကွက် (၁)၊ နယ်မြေ (၂)၊ စိန်ချယ်လမ်းရှိ နေအိမ်တစ်လုံးတွင် ယနေ့ ဇွန်လ ၇ ရက်၊ ည ၈ နာရီ ၂၀ မိနစ်ခန့်က မီးလောင်ကျွမ်းမှု ဖြစ်ပွားခဲ့ခြင်းဖြစ်ကြောင်း သိရသည်။

.

.

မီးလောင်မှုဖြစ်ပွားရာသို့ ရွှေညောင်မီးသတ်စခန်းမှ မီးသတ်ယာဉ် ၁ စီး၊ ရေသယ်ယာဉ် ၁ စီး၊ သန္ဓေနှင့် အရန်မီးသတ်တပ်ဖွဲ့ဝင်များ၊ ရပ်ကွက်နေပြည်သူများ ဝိုင်းဝန်းငြှိမ်းသတ်ခဲ့ရာ ည ၈ နာရီ ၄၅ မိနစ်တွင် မီးငြှိမ်းသတ်နိုင်ခဲ့ကြောင်း သိရသည်။

🌸 ရှမ်းစည်ပင်ဝန်ကြီး တာချီလိတ်မြို့ ဖွံ့ဖြိုးရေးလုပ်ငန်းများ ကွင်းဆင်းစစ်ဆေး

.

တာချီလိတ်၊ ဇွန် ၇

.

ရှမ်းပြည်နယ်အစိုးရအဖွဲ့ဝင် ပြည်နယ်စည်ပင်သာယာရေးဝန်ကြီး ခွန်ထွန်းဖြူ သည် ယနေ့ ဇွန်လ ၇ ရက်၊ နံနက်ပိုင်းက တာချီလိတ်မြို့အတွင်း ဆောင်ရွက်လျက်ရှိသည့် မြို့ပြဖွံ့ဖြိုးရေး၊ ရေစီးရေလာ ကောင်းမွန်ရေး နှင့် မြို့သန့်ရှင်းသာယာလှပရေး လုပ်ငန်းများကို ကွင်းဆင်းကြည့်ရှု စစ်ဆေးခဲ့ကြောင်း သိရသည်။

.

.

ထိုသို့ စစ်ဆေးရာတွင် ပြည်နယ်ဝန်ကြီးနှင့် အဖွဲ့သည် တာချီလိတ်မြို့၊ ဝမ်ကောင်းရပ်ကွက်၊ ဘုရင့်နောင်ဈေး လမ်းတွင် ၂၀၂၆-၂၀၂၇ ဘဏ္ဍာရေးနှစ်အတွင်း ဆောင်ရွက်မည့် အရှည် ၁၀၈၀ ပေ၊ အကျယ် ၁၈ ပေ၊ အထူ ၁၀ လက်မရှိ ကွန်ကရစ်လမ်း တည်ဆောက်ရေးလုပ်ငန်း၊ ပုန်းထွန်ရပ်ကွက်၊ အမှတ် (၆) လမ်း၊ အလူရာဟို တယ်အနီးတွင် တည်ဆောက်ထားသည့် အရှည် ၁၄၂၀ ပေရှိ မြေထိန်းနံရံနှင့် ရေထိန်းတံခါး တည်ဆောက် ထားမှု အခြေအနေများကို ကြည့်ရှုစစ်ဆေးခဲ့ပြီး ပုန်းထွန်လမ်းသွယ် (၁) ရှိ ၂၀ ပေ × ၅ ပေ × ၄ ပေ Box Culvert တည်ဆောက်ထားမှု အခြေအနေများကိုလည်း စစ်ဆေး ကြည့်ရှုရာ မြို့နယ်စည်ပင်သာယာရေးဌာန အမှုဆောင်အရာရှိ ဦးကျော်မင်းထိုက်က ရှင်းလင်းတင်ပြခဲ့ကြောင်း သိရသည်။

🌸 စာသင်ကျောင်းနှင့် လူနေအိမ်တံခါးရွက်များ လိုက်လံခိုးယူသူကို ထောင်ဒဏ် ၆ နှစ် ချမှတ်

.

တောင်ကြီး၊ ဇွန် ၇

.

တောင်ကြီးမြို့နယ်၊ ရွှေညောင်မြို့တွင် စာသင်ကျောင်းနှင့် လူနေအိမ်များမှ တံခါးရွက်များ လိုက်လံခိုးယူ နေသူကို တောင်ကြီးမြို့နယ်တရားရုံးက ဇွန်လ ၅ ရက်တွင် ထောင်ဒဏ် ၆ နှစ် ချမှတ်ခဲ့ကြောင်း သိရသည်။

.

.

ရွှေညောင်မြို့၊ မင်္ဂလာအောင်မြေရပ်ကွက်၊ ရန်မျိုးအောင်လမ်းသွယ်တွင် ပြီးခဲ့သည့် မတ်လ ၃၀ ရက်က အလျား ၆ ပေ၊ အနံ ၂ ပေခွဲခန့်ရှိ ကျွန်းတံခါးရွက်တစ်ချပ်နှင့်အတူ မသင်္ကာဖွယ် အမျိုးသားတစ်ဦးအား တွေ့ရှိသဖြင့် စစ်ဆေးရာ တင်ထွန်းဦး (ခ) ဘုကြီး ဆိုသူဖြစ်ကြောင်း သိရပြီး တံခါးရွက်နှင့် ပတ်သက်၍ ပိုင်ဆိုင်ကြောင်း သက်သေအထောက်အထား တစ်စုံတစ်ရာ မပြသနိုင်သဖြင့် ရွှေညောင်မြို့မရဲစခန်းတွင် ခေါ်ယူစစ်ဆေးခဲ့ခြင်းဖြစ်ကြောင်း သိရသည်။

🌸 တောင်ကြီးတွင် ကမ္ဘာ့ပတ်ဝန်းကျင်ထိန်းသိမ်းရေးနေ့ အထိမ်းအမှတ် စုပေါင်းသန့်ရှင်းရေး ပြုလုပ်

.

တောင်ကြီး၊ ဇွန် ၇

.

ရှမ်းပြည်နယ်မြို့တော် တောင်ကြီးမြို့၊ စူဠာမုနိ လောကချမ်းသာစေတီတော်တွင် ကမ္ဘာ့ ပတ်ဝန်းကျင် ထိန်းသိမ်းရေးနေ့ အထိမ်းအမှတ်အဖြစ် စုပေါင်း သန့်ရှင်းရေး ပြုလုပ်ပြီး အရိပ်ရသစ်ပင်များ စိုက်ပျိုးခဲ့ကြောင်း သိရသည်။

.

.

"ကမ္ဘာပတ်ဝန်းကျင်ထိန်းသိမ်းရေးနေ့က ကိစ္စတစ်ခုရှိလို့ မလုပ်လိုက်ရတော့ အဲဒီအထိမ်းအမှတ် အနေနဲ့ ဒီနေ့ လုပ်တာပါ။ ဘုရားပေါ်မှာ ပလတ်စတစ်အမှိုက်တွေ ရှင်းလင်းရင်းနဲ့ အပင်စိုက်ဖြစ်ပါတယ်။ အများကြီးတော့ မဟုတ်ပါဘူး။ ရေမြော ၅ ပင်၊ မာတာကွတ် ၅ ပင်ပါ။ ပြီးတော့ မနှစ်က စိုက်ထားတဲ့ အပင်တွေကို ပြန်ပြီးတော့ ထိန်းသိမ်းတာ လုပ်ပါတယ်" ဟု ရှင်သန်ကမ္ဘာမြေအစိမ်းရောင်ကွန်ရက်မှ ဒေါ်ချယ်ရီကျော်က ပြောသည်။

🌸 တောင်ကြီး မြို့တော်ခန်းမတွင် မအိမ့်ချစ်သူနှင့် လူငယ်မောင်မယ်များကို ကြိုဆိုဂုဏ်ပြု

.

တောင်ကြီး၊ ဇွန် ၆

.

တေရသမအကြိမ် မြန်မာနိုင်ငံလုံးဆိုင်ရာ သုတစုံလင် ဗုဒ္ဓဝင် ဖြေဆိုပူဇော်ပွဲ၌ ပထမဆု ရရှိသည့် မအိမ့်ချစ်သူ နှင့် ထူးချွန်လူငယ်မောင်မယ်များအား ကြိုဆိုဂုဏ်ပြုသည့် အခမ်းအနားကို တောင်ကြီးမြို့ရှိ မြို့တော်ခန်းမ၌ ယနေ့ ဇွန်လ ၆ ရက်၊ ညနေပိုင်းတွင် ပြုလုပ်ခဲ့ကြောင်း သိရသည်။

.

.

အဆိုပါ အခမ်းအနားသို့ သုတစုံလင် ဗုဒ္ဓဝင် ဖြေဆိုပူဇော်ပွဲ၏ ထူးချွန် လူငယ်မောင်မယ်များ ဖြစ်ကြသည့် မအိမ့်ချစ်သူ၊ ဗဟိုအဆင့် အလယ်တန်းအောင်မြင်သူ ၁၁ ဦး၊ မူလတန်းအဆင့် စတုတ္ထ ရရှိသူ ၁ ဦး၊ ပြည်နယ်အဆင့် အောင်မြင်သူ ၄၃ ဦးတို့နှင့် အတူ ရှမ်းပြည်နယ်ဝန်ကြီးချုပ် စိုင်းထိန်စိုး၊ ရှမ်းပြည်နယ် လွှတ်တော် ဥက္ကဌ စိုင်းလုံကျော်၊ ရှမ်းပြည်နယ်တရားလွှတ်တော် တရားသူကြီးချုပ် ဦးသန်းဦးလွင်၊ ပြည်နယ်အစိုးရအဖွဲ့ဝင်များ၊ ဖိတ်ကြားထားသူများ၊ ဒေသခံပြည်သူများ တက်ရောက်ခဲ့ကြသည်။

🌸 တာချီလိတ်တွင် (၃၂) ကြိမ်မြောက် နိကာယ်စာမေးပွဲ (ဝိဒူတန်း) စတင်ဖြေဆို

.

တာချီလိတ်၊ ဇွန် ၅

.

ရှမ်းပြည်နယ်အရှေ့ပိုင်း၊ တာချီလိတ်မြို့၊ မကာဟိုခမ်းရပ်ကွက်ရှိ မြို့နယ်ဓမ္မာရုံတွင် ယနေ့ ဇွန်လ ၅ ရက်၊ နေ့လယ်ပိုင်းက (၃၂) ကြိမ်မြောက် နိကာယ်စာမေးပွဲ (ဝိဒူတန်း) ကို စတင်ဖြေဆိုခဲ့ကြောင်း သိရသည်။

.

.

နိကာယ်စာမေးပွဲကို တာချီလိတ်မြို့နယ် သံဃာနာယက ဥက္ကဋ္ဌ ဆရာတော် သုဓမ္မာ၊ ရွှေကျင်အမှူးပြုသော အဖွဲ့ဝင်ဆရာတော်များ၏ အနီးကပ်ကြီးကြပ်မှုဖြင့် ဇွန်လ ၅ ရက်မှ ၁၀ ရက်အထိ ၅ ရက်တိုင်တိုင် ကျင်းပ သွားမည်ဖြစ်ပြီး စာဖြေသံဃာတော်များနှင့် သီလရှင်ဆရာလေးများ စုစုပေါင်း ၃၅ ပါး ဝင်ရောက် ဖြေဆို လျက်ရှိကြောင်း သိရသည်။

🌸 အကောက်ခွန်မဲ့ ဘီယာဖာများ တင်ဆောင်မောင်းနှင်လာသည့် တရားမဝင် တရုတ်နိုင်ငံသား ယာဉ်မောင်းကို ဖမ်းမိ

.

လားရှိုး၊ ဇွန် ၅

.

ရှမ်းပြည်နယ်မြောက်ပိုင်း၊ လားရှိုးမြို့တွင် ယနေ့ ဇွန်လ ၅ ရက်၊ နံနက်ပိုင်းက တရုတ်နံပါတ်ပြားတပ် ယာဉ်ဖြင့် ဝင်ရောက်လာသည့် တရားမဝင်တရုတ် နိုင်ငံသားကို အကောက်ခွန်မဲ့ ဘီယာဖာများနှင့်အတူ ဖမ်းဆီးရမိခဲ့ကြောင်း သိရသည်။

.

.

လားရှိုးမြို့အဝင် မယ်ဟန်ပူးပေါင်းစစ်ဆေးရေးဂိတ်သို့ ယနေ့ ဇွန်လ ၅ ရက်၊ နံနက် ၁၀ နာရီခန့်က တရုတ် နိုင်ငံသုံး နံပါတ်ပြား တပ်ဆင်ထားသည့် ၂၂ ဘီး တွဲယာဉ်တစ်စီး ဝင်ရောက်လာသဖြင့် လုံခြုံရေးတပ်ဖွဲ့ဝင် များက စစ်ဆေးရာ တရုတ်နိုင်ငံသားကတ်၊ တရုတ်ယာဉ်မောင်းလိုင်စင် ကိုင်ဆောင်လာသည့် တရားမဝင် တရုတ်နိုင်ငံသားတစ်ဦးကို တရုတ်နိုင်ငံထုတ် တရားမဝင် အကောက်ခွန်မဲ့ ဘီယာဖာများဖြင့် ဖမ်းဆီးရမိ ခဲ့ခြင်းဖြစ်ကြောင်း သိရသည်။

🌸 စစ်အုပ်ချုပ်ရေးကြေညာထားသည့် မြို့နယ်များကို သက်တမ်းတိုးရန် ပြည်ထောင်စုရှေ့နေချုပ် တင်ပြ

.

၂၀၂၆ ခုနှစ်၊ ဇွန်လ ၅ ရက်

.

မြန်မာနိုင်ငံတစ်ဝှမ်းရှိ မြို့နယ် ၆၀ ၌ ကြေညာထားသည့် စစ်အုပ်ချုပ်ရေးအမိန့်များကို သက်တမ်းတိုးရန် ပြည်ထောင်စုရှေ့နေချုပ်၊ ဥပဒေရေးရာဝန်ကြီး ဒေါက်တာသီတာဦးက ပြည်ထောင်စုလွှတ်တော်သို့ တင်ပြခဲ့သည် ဟု သိရသည်။

.

.

ယမန်နေ့ ဇွန်လ ၄ ရက်က ပြုလုပ်ခဲ့သည့် တတိယအကြိမ် ပြည်ထောင်စုလွှတ်တော်၊ ဒုတိယပုံမှန်အစည်း အဝေး၊ ပထမနေ့တွင် နိုင်ငံတော်သမ္မတ ကိုယ်စား ဥပဒေရေးရာဝန်ကြီးနှင့် ရှေ့နေချုပ် ဒေါက်တာ သီတာဦးက ယင်းကဲ့သို့ တင်ပြခဲ့ခြင်းဖြစ်ကြောင်း သိရသည်။

🌸 ကလောမြို့နယ်၊ ကုန်းပေါ်ကျေးရွာတွင် ၄၀၀ ဗို့ဓါတ်အားလိုင်းကြိုး ခိုးယူခံရ

.

ကလော၊ ဇွန် ၅

.

ရှမ်းပြည်နယ်တောင်ပိုင်း၊ ကလောမြို့နယ်၊ နန်းတိုင်းကျေးရွာအုပ်စု၊ ကုန်းပေါ်ကျေးရွာတွင် မေလ ၂၈ ရက်၊ နံနက်အစောပိုင်းက ၄၀၀ ဗို့ ဓါတ်အားလိုင်းကြိုးများ ခိုးယူခံရမှု ဖြစ်ပွားခဲ့ကြောင်း သိရသည်။

.

.

ကလောမြို့နယ်၊ နန်းတိုင်းကျေးရွာအုပ်စု၊ ကုန်းပေါ်ကျေးရွာသို့ ၃၃/၀.၄ ကေဗွီ ထရန်စဖော်မာမှ ကိုယ်ထူ ကိုယ်ထ ဓါတ်အားဖြန့်ဖြူးပေးနေသည့် ၄၀၀ ဗို့ ဓါတ်အားလိုင်း အခန်း ၅ ခန်းရှိ HDBC No.4 (၄) ကြိုး၊ ခန့်မှန်းအရှည်ပေ ၅၀၀ ခန့်အား မတ်လ ၂၈ ရက်၊ နံနက် ၁ နာရီအချိန်ခန့်က ဖြတ်တောက်ခိုးယူခံခဲ့ရခြင်း ဖြစ်ကြောင်း သိရသည်။

🌸 တောင်ကြီးတွင် ကမ္ဘာ့ပတ်ဝန်းကျင်ထိန်းသိမ်းရေးအထိမ်းအမှတ် အခမ်းအနား ကျင်းပ

.

တောင်ကြီး၊ ဇွန် ၅

.

ရှမ်းပြည်နယ်မြို့တော် တောင်ကြီးမြို့၊ မြို့တော်ခန်းမတွင် ယနေ့ ဇွန်လ ၅ ရက်၊ နံနက်ပိုင်းက ၂၀၂၆ ခုနှစ်၊ ကမ္ဘာ့ပတ်ဝန်းကျင်ထိန်းသိမ်းရေးနေ့ အထိမ်းအမှတ် အခမ်းအနားကို ကျင်းပပြုလုပ်ခဲ့ကြောင်း သိရသည်။

.

.

အခမ်းအနားတွင် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် စိုင်းထိန်စိုးက နိုင်ငံ၏ လူမှုစီးပွား ဖွံ့ဖြိုး တိုးတက်ရေးလုပ်ငန်းများ အကောင်အထည်ဖော် ဆောင်ရွက်ရာတွင် ပတ်ဝန်းကျင် ထိန်းသိမ်းရေးလုပ်ငန်း များကို ယှဉ်တွဲဆောင်ရွက်ရန် လိုအပ်သည်ဟု ရှမ်းပြည်နယ်ဝန်ကြီးချုပ် စိုင်းထိန်စိုး က ပြောဆိုခဲ့သည်။

🌸 ကလောတွင် အမျိုးသားတစ်ဦးထံက စိတ်ကြွရူးသွပ်ဆေးပြား ၄၀၀ ဖမ်းမိ

.

ကလော၊ ဇွန် ၄

.

ရှမ်းပြည်နယ်တောင်ပိုင်း၊ ကလောမြို့တွင် ယမန်နေ့ ဇွန်လ ၃ ရက်၊ ညနေပိုင်းက အမျိုးသားတစ်ဦးထံမှ စိတ်ကြွရူးသွပ်ဆေးပြား ၄၀၀ အား လက်ဝယ်ထားရှိသူနှင့်အတူ ဖမ်းဆီးရမိခဲ့ကြောင်း သိရသည်။

.

.

တောင်ကြီး ခရိုင်မူးယစ်တပ်ဖွဲ့စု ပါဝင်သော ပူးပေါင်းအဖွဲ့က ယမန်နေ့ ဇွန်လ ၃ ရက်၊ ညနေပိုင်းတွင် ကလောမြို့၊ အင်းပြင်ရပ်ကွက်နေ ကျော်လှိုင်ဦး၏ နေအိမ်အား ဝင်ရောက်ရှာဖွေရာ ၎င်းအိပ်သည့် အိပ်ရာ ဘေးရှိ အမည်းရောင် ကြွပ်ကြွပ်အိတ်အတွင်းမှ WY စာတမ်းပါ ပန်းရောင်စိတ်ကြွရူးသွပ်ဆေးပြား ၂၀၀ ပြားပါ ၂ ထုပ်၊ စုစုပေါင်း ဆေးပြား ၄၀၀ အား ဖမ်းဆီးရမိခဲ့ခြင်းဖြစ်ကြောင်း သိရသည်။

🌸 တာချီလိတ်မြို့ အမှိုက်သိမ်းဆည်းရေးလုပ်ငန်း အဆင့်မြှင့်တင်နိုင်ရေး ဆွေးနွေး

.

တာချီလိတ်၊ ဇွန် ၄

.

ရှမ်းပြည်နယ်အရှေ့ပိုင်း၊ တာချီလိတ်မြို့၊ အမှိုက်သိမ်းဆည်းရေးလုပ်ငန်းများ အဆင့်မြှင့်တင်နိုင်ရေး ညှိနှိုင်းအစည်းအဝေးကို ယမန်နေ့ ဇွန်လ ၃ ရက်၊ ညနေပိုင်းက မြို့နယ်စည်ပင် သာယာရေးဌာန၊ အစည်းအဝေးခန်းမတွင် ပြုလုပ်ခဲ့ကြောင်း သိရသည်။

.

.

“တာချီလိတ်မြို့က နယ်စပ်မြို့တစ်မြို့ ဖြစ်တဲ့အတွက် အမှိုက်တွေ ဒီထက်ပိုပြီး ပြောင်အောင် သိမ်းနိုင်ဖို့၊ သူ့သတ်မှတ်ရက်၊ သတ်မှတ်အချိန်တွေမှာ အချိန်မှန် အမှိုက်သိမ်းနိုင်ဖို့၊ ဗိုလ်ချုပ်လမ်းမကြီးနဲ့ အများပြည်သူ နဲ့ သက်ဆိုင်တဲ့ နေရာတွကို စည်ပင်သာယာဌာနနဲ့ ပူးပေါင်းပြီး သိမ်းဆည်းဖို့၊ ချောင်းတွေ၊ မြောင်းတွေမှာ အမှိုက်မပစ်ဖို့ ကုမ္ပဏီနဲ့ စည်ပင်နဲ့ ပူးပေါင်းပြီး ကြပ်မတ်ဖို့ ဆွေးနွေးခဲ့ပါတယ်” ဟု တာချီလိတ်မြို့နယ် စည်ပင်သာယာရေးဌာနမှ အမှုဆောင်အရာရှိ ဦးကျော်မင်းထိုက်က ပြောဆိုထားသည်။

🌸 ရွှေညောင်တွင် ယာဉ်တိုက်မှုဖြစ်ပြီး အမျိုးသမီးတစ်ဦး သေဆုံး

.

ရွှေညောင်၊ ဇွန် ၃

.

ရှမ်းပြည်နယ်တောင်ပိုင်း၊ တောင်ကြီးမြို့နယ်၊ ရွှေညောင်မြို့တွင် ယမန်နေ့ ဇွန်လ ၂ ရက်၊ ညနေပိုင်းက ယာဉ်တိုက်မှု ဖြစ်ပွားပြီး အမျိုးသမီးတစ်ဦး သေဆုံးမှု ဖြစ်ပွားခဲ့ကြောင်း သိရသည်။

.

.

ရွှေညောင်မြို့၊ သုခချမ်းသာရပ်ကွက်၊ ဘူတာလမ်းဆုံအနီး၊ နီလာလမ်းတွင် ယမန်နေ့ ဇွန်လ ၂ ရက်၊ ညနေ ၃ နာရီခွဲ ခန့်က သရက်သီးအိတ်များ တင်ဆောင်မောင်းနှင်လာသည့် ၆ ဘီးယာဉ်နှင့် ဘူတာလမ်းဘက်မှ အမျိုးသမီး ၃ ဦး မောင်းနှင်စီးနင်းလာသည့် Honda Click အမျိုးအစား ဆိုင်ကယ်တို့ ဝင်ရောက်တိုက်မိခဲ့ခြင်း ဖြစ်ကြောင်း သိရသည်။

🌸 တာချီလိတ်တွင် လျှပ်စစ်ဝန်အား လျှော့ချဖြန့်ဖြူးမည်

.

တာချီလိတ်၊ ဇွန် ၃

.

ရှမ်းပြည်နယ်အရှေ့ပိုင်း၊ တာချီလိတ်မြို့တွင် ဇွန်လအတွင်း လျှပ်စစ်ဝန်အား လျှော့ချဖြန့်ဖြူးသွားမည် ဖြစ်ကြောင်း မြို့ သိရသည်။

.

.

ပူပြင်းခြောက်သွေ့သည့် နွေရာသီကာလတွင် ဓာတ်အားသုံးစွဲမှု များပြားလာသဖြင့် နေ့စဉ် ဓာတ်အားသုံးစွဲမှု အမြင့်ဆုံးအချိန်ဖြစ်သည့် ညနေ ၆ နာရီမှ စတင်ကာ နောက်ပိုင်း နာရီအချို့အထိ လိုအပ်သလို ဝန်အား လျှော့ချ ၍ အလှည့်ကျ ဖြန့်ဖြူးသွားမည်ဖြစ်ကြောင်း သိရသည်။

🌸 ပအိုဝ်းဒေသဦးစီးအဖွဲ့ ဥက္ကဋ္ဌ ဆီဆိုင်မြို့နယ်၊ နားမွန်းကျေးရွာတွင် ဒေသခံများနှင့် တွေ့ဆုံ

.

ဆီဆိုင်၊ ဇွန် ၃

.

ပအိုဝ်းကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ ဥက္ကဋ္ဌ ခွန်ဖိုးစိန်နှင့် အဖွဲ့သည် ယမန်နေ့ ဇွန်လ ၂ ရက်က ဆီဆိုင်မြို့နယ်၊ နားသံကျေးရွာအုပ်စု၊ နားမွန်းကျေးရွာ ဘုန်းတော်ကြီးကျောင်းတွင် နားသံကျေးရွာအုပ်စုနှင့် နားခုဲင်းကျေးရွာအုပ်စုရှိ ဒေသခံပြည်သူလူထုများနှင့် တွေ့ဆုံခဲ့ကြောင်း သိရသည်။

.

.

ထိုသို့ တွေ့ဆုံရာတွင် ဒေသဦးစီးအဖွဲ့ ဥက္ကဋ္ဌ ခွန်ဖိုးစိန်၊ ဒေသဦးစီးအဖွဲ့ဝင် ဦးခွန်ညိုမောင်၊ ဦးခွန်ကျော်အေး၊ ဦးခွန်ဒီဂေါလ် နှင့် ဦးတင်မိုးအောင်၊ ဆီဆိုင်မြို့နယ်အုပ်ချုပ်ရေးမှူး ခွန်ကျော်ရန်နှင့် မြို့နယ်အဆင့် ဌာနဆိုင်ရာတာဝန်ရှိသူများက အသီးသီး မိတ်ဆက်ဆွေးနွေးခဲ့ကြောင်း သိရသည်။

🌸 အွန်လိုင်းလိမ်လည်မှု အပါအဝင် တရားမဝင်လုပ်ငန်းများ လုပ်ကိုင်သည့် အထောက်အထားမဲ့ ပြည်ပနိုင်ငံသား ၇ သောင်းကျော် ဖမ်းဆီးနိုင်ခဲ့

.

တောင်ကြီး၊ ဇွန် ၃

.

အွန်လိုင်းလိမ်လည်မှု အပါအဝင် တရားမဝင်လုပ်ငန်းများ လုပ်ကိုင်ရန် မြန်မာနိုင်ငံ နယ်စပ်ဒေသများ အတွင်းသို့ အထောက်အထားမဲ့ ဝင်ရောက်လာသူ တရားမဝင်နိုင်ငံသား ၇ သောင်းကျော်အား ရှာဖွေ ဖော်ထုတ် ဖမ်းဆီးနိုင်ခဲ့သည်ဟု သိရသည်။

.

.

အဆိုပါ တရားမဝင်နိုင်ငံသားများကို ၂၀၂၃ ခုနှစ်၊ အောက်တိုဘာလ ၅ ရက်မှ ၂၀၂၆ ခုနှစ်၊ မေလ ၂၈ ရက်အတွင်း ဖမ်းဆီးရမိခဲ့ခြင်း ဖြစ်ပြီး ၎င်းတို့သည် မြန်မာနိုင်ငံနယ်စပ်ဒေသများအတွင်းသို့ တရားမဝင် ဝင်ရောက်၍ အွန်လိုင်းလိမ်လည်မှုပြုလုပ်ခြင်း၊ ကာစီနိုကစားဝိုင်းများ ပြုလုပ်ခြင်း၊ အနှိပ်ခန်းနှင့် တရားမဝင် ပြည့်တန်ဆာလုပ်ငန်းများ ပြုလုပ်ခြင်းနှင့် စားသောက်ဆိုင်လုပ်ငန်းများ ပြုလုပ်ဆောင်ရွက်သူများ ဖြစ်ကြောင်း သိရသည်။

🌸 ရှမ်းပြည်နယ်တစ်ခုလုံးတွင် ကျောင်းအပ်နှံသူ ၅၆၀၀၀၀ ကျော်ရှိ

.

တောင်ကြီး၊ ဇွန် ၂

.

ရှမ်းပြည်နယ်တစ်ခုလုံးအနေဖြင့် အခြေခံပညာအဆင့် အစိုးရကျောင်း၊ ကိုယ်ပိုင်ကျောင်းနှင့် ဘုန်းတော်ကြီး သင် ပညာရေးကျောင်းများတွင် ယမန်နေ့ ဇွန်လ ၁ ရက်အထိ ကျောင်းအပ်နှံသူ ကျောင်းသား/သူ ဦးရေ ၅၆၀၀၀၀ ကျော် ရှိသည်ဟု ရှမ်းပြည်နယ်ပညာရေးမှူးရုံးက သိရသည်။

.

.

၂၀၂၆-၂၀၂၇ ပညာသင်နှစ် အခြေခံပညာကျောင်းများကို ယမန်နေ့ ဇွန်လ ၁ ရက်က စတင်ဖွင့်လှစ်ခဲ့ရာ ရှမ်းပြည်နယ်တစ်ခုလုံးအတိုင်းအတာဖြင့် အစိုးရအခြေခံကျောင်း၊ ကိုယ်ပိုင်ကျောင်းနှင့် ဘုန်းတော်ကြီးသင် ပညာရေးကျောင်းများ၌ မူလတန်းအဆင့် အပ်နှံသူ ၃၉၂၈၂၃ ဦး၊ အလယ်တန်းအဆင့် အပ်နှံသူ ၁၃၉၀၃၄ ဦးနှင့် အထက်တန်းအဆင့် အပ်နှံသူ ၂၈၆၆၂ ဦး၊ စုစုပေါင်း ၅၆၀၅၁၉ ဦး ရှိကြောင်း သိရသည်။

🌸 တောင်ကြီးတွင် ဆိုင်ကယ်ခိုးယူလာသူ ၂ ဦးကို သက်သေခံ ဆိုင်ကယ်နှင့်အတူ ဖမ်းမိ

.

တောင်ကြီး၊ ဇွန် ၁

.

တောင်ကြီးမြို့၊ ကံသာရပ်ကွက်တွင် ယနေ့ ဇွန်လ ၁ ရက်၊ နံနက်ပိုင်းက မော်တော်ဆိုင်ကယ် ခိုးယူလာသူ ၂ ဦးကို သက်သေခံဆိုင်ကယ်နှင့်အတူ ဖမ်းဆီးရမိခဲ့ကြောင်း သိရသည်။

.

.

တောင်ကြီးမြို့၊ ကံသာရပ်ကွက်၊ မေတ္တာရှင်လမ်းမပေါ်တွင် ယနေ့ ဇွန်လ ၁ ရက်၊ နံနက်ပိုင်းက အမျိုးသား နှစ်ဦး မောင်းနှင်လာသည့် မသင်္ကာဖွယ်ရာ သော့မပါ ဆိုင်ကယ်တစ်စီးကို ရဲတပ်ဖွဲ့မှ ရပ်တန့်စစ်ဆေးရာမှ ခိုးမှု ပေါ်ပေါက်ခဲ့ခြင်းဖြစ်ကြောင်း သိရသည်။

🌸 ကလောမြို့နယ်အတွင်း အခြေခံပညာအဆင့် ကျောင်းသား/သူ ၃ သောင်းကျော် တက်ရောက် ပညာသင်ကြား

.

ကလော၊ ဇွန် ၁

.

ရှမ်းပြည်နယ်တောင်ပိုင်း၊ ကလောခရိုင်၊ ကလောမြို့နယ်အတွင်း ၂၀၂၆-၂၀၂၇ ပညာသင်နှစ်၌ ကျောင်းသား/ ကျောင်းသူ စုစုပေါင်း ၃ သောင်းကျော် ပညာသင်ကြားလျက်ရှိကြောင်း သိရသည်။

.

.

၂၀၂၆-၂၀၂၇ ပညာသင်နှစ် အခြေခံပညာကျောင်းများ၊ ကိုယ်ပိုင်ကျောင်းများ၊ ဘုန်းတော်ကြီးသင် ပညာရေး ကျောင်းများကို ယနေ့ ဇွန်လ ၁ ရက်တွင် စတင်ဖွင့်လှစ် သင်ကြားနေခြင်းဖြစ်သည်။

🌸 တောင်ကြီးမြို့မဈေးအတွင်း ဂက်စ်အိုးပေါက်ပြီး အသေးစားမီးလန့်မှု ဖြစ်

.

တောင်ကြီး၊ ဇွန် ၁ ရက်

.

ရှမ်းပြည်နယ်မြို့တော်၊ တောင်ကြီးမြို့၊ မြို့မဈေးအတွင်းရှိ ပျံကျ စားသောက်ဆိုင်တန်းတွင် ယမန်နေ့ မေလ ၃၁ ရက်၊ နေ့လယ်ပိုင်းက ဂစ်အိုးအသေး ပေါက်ကွဲပြီး အသေးစား မီးလန့်မှုတစ်ခု ဖြစ်ပွားခဲ့ကြောင်း သိရသည်။

.

.

“မီးလောင်တာ ဟုတ်ပါတယ်။ လူထိခိုက်မှု မရှိပါဘူး။ ကလေးတစ်ဦးတော့ ဆံပင် မီးလေးဟပ်သွားတာ ပေါ့။ ကြီးကြီးမားမားတော့ မရှိပါဘူး။ ဒါပေမဲ့ သူတို့ကို ဈေးထဲမှာ ဖြစ်နေတာကြောင့် ဆိုင်ရောင်းချခွင့် တစ်လ ပိတ်လိုက်ပါတယ်” ဟု တာဝန်ရှိသူတစ်ဦးက ပြောဆိုထားသည်။