🌸 တာချီလိတ်မြို့နယ်၊ စန်းလုကျေးရွာတွင် အထူးကုဆရာဝန်များက အခမဲ့ ကျန်းမာရေးစောင့်ရှောက်မှု ကွင်းဆင်းဆောင်ရွက်

.

တာချီလိတ်၊ ဇွန် ၂၁

.

ကျန်းမာရေးဝန်ကြီးဌာန၊ ကုသရေးဦးစီးဌာန၏ လမ်းညွှန်မှုဖြင့် တာချီလိတ်မြို့ ခုတင် ၁၀၀ ဆံ့ ခရိုင် ပြည်သူ့ဆေးရုံမှ အထူးကုဆရာဝန်များပါဝင်သည့် ဆေးကုသရေးအဖွဲ့သည် ယနေ့ ဇွန်လ ၂၁ ရက်၊ နံနက်ပိုင်းက တာချီလိတ်မြို့နယ်၊ လွယ်တော်ခမ်းကျေးရွာအုပ်စု၊ စန်းလုကျေးရွာနှင့် အနီးပတ်ဝန်းကျင်ရှိ ပြည်သူများအား အခမဲ့ကျန်းမာရေး စောင့်ရှောက်မှုလုပ်ငန်းများ ကွင်းဆင်းဆောင်ရွက်ပေးခဲ့ကြောင်း သိရသည်။

.

.

အဆိုပါ ဆေးကုသရေးအဖွဲ့တွင် ခွဲစိတ်ရောဂါအထူးကုဆရာဝန်၊ သမားတော်အထူးကုဆရာဝန်၊ သွားနှင့် ခံတွင်းအထူးကုဆရာဝန်၊ အထွေထွေရောဂါဆရာဝန်များနှင့် ကျွမ်းကျင်ကျန်းမာရေးဝန်ထမ်းများ ပါဝင်ပြီး ဒေသခံတိုင်းရင်းသားပြည်သူများ၏ ကျန်းမာရေးအခြေအနေများကို စမ်းသပ်စစ်ဆေး၍ လိုအပ်သည့် ဆေးဝါးကုသမှုများကို အခမဲ့ဆောင်ရွက်ပေးခဲ့ကြောင်း သိရသည်။

.

ထို့အပြင် ဆေးကုသမှုလုပ်ငန်းများ အဆင်ပြေချောမွေ့စေရေးအတွက် သက်ဆိုင်ရာဌာနဆိုင်ရာများ၊ ရပ်မိရပ်ဖများနှင့် ပြည်သူ့ကျန်းမာရေးဝန်ထမ်းများက လူနာများအား လမ်းညွှန်ကူညီဆောင်ရွက်ပေးခြင်းနှင့် လိုအပ်သည့် ဝန်ဆောင်မှုများ ပံ့ပိုးပေးခဲ့ကြကြောင်း သိရသည်။

.

အဆိုပါ ကျန်းမာရေးစောင့်ရှောက်မှုလုပ်ငန်းများအတွင်း ခွဲစိတ်လူနာ ၂၈ ဦး၊ သမားတော်လူနာ ၄၄ ဦး၊ သွားနှင့်ခံတွင်းလူနာ ၃၂ ဦး၊ အထွေထွေရောဂါလူနာ ၆၈ ဦး စုစုပေါင်း လူနာ ၁၇၂ ဦးအား အခမဲ့ စမ်းသပ်စစ်ဆေး ကုသပေးနိုင်ခဲ့ကြောင်း သိရသည်။

.

ထို့အပြင် တာချီလိတ်ခရိုင် ပြည်သူ့ကျန်းမာရေးဦးစီးဌာနမှ ဒုတိယဦးစီးမှူး(ကျန်းမာပညာ)နှင့်အဖွဲ့သည် လာရောက်ပြသသည့် ပြည်သူများနှင့် အခြားသူ စုစုပေါင်း ၉၀ ဦးအား ကျန်းမာရေးအသိပညာပေးခြင်း၊ ကလေးများ၏ ပုံမှန်ကာကွယ်ဆေးထိုးနှံမှုအခြေအနေ စစ်ဆေးခြင်း၊ လက်မောင်းလုံးပတ်တိုင်းတာခြင်း၊ အာဟာရဆိုင်ရာ အသိပညာပေးခြင်းနှင့် ကာကွယ်ဆေးထိုးနှံမှုဆိုင်ရာ အသိပညာပေးခြင်းများကို ဆောင်ရွက်ခဲ့ကြကြောင်း သိရသည်။

.

အလားတူ အထူးကုသမားတော်များနှင့် ပြသပြီးသော လူနာများအား ကိုဗစ်-၁၉ ရောဂါကာကွယ်ဆေး ထိုးနှံပေးခဲ့ရာ လူဦးရေ ၅၄ ဦးအား ထိုးနှံပေးနိုင်ခဲ့ပြီး ဆေးစိမ်ခြင်ထောင် အလုံး ၅၀ ကိုလည်း ဖြန့်ဝေပေး ခဲ့ကြောင်း သိရသည်။

.

#ShanGazette #Tachileik #Health

.