🌸 တောင်ကြီး-ကျောက်တလုံးကြီးလမ်းတွင် စိတ်ကြွရူးသွပ်ဆေးပြား ၃၀၀၀၀ ဖမ်းမိ

.

တောင်ကြီး၊ ဇွန် ၂၁

.

ရှမ်းပြည်နယ်တောင်ပိုင်း၊ တောင်ကြီးမြို့၊ ကျောင်းကြီးစုရပ်ကွက်၊ ကျောက်တလုံးကြီးလမ်းမပေါ်တွင် ယနေ့ ဇွန်လ ၂၁ ရက်၊ နံနက် ပိုင်းက အမျိုးသား ၂ ဦး ထံမှ စိတ်ကြွရူးသွပ်ဆေးပြား ၃၀၀၀၀ ဖမ်းဆီးရမိခဲ့ပြီး ကွင်းဆက်တရားခံ ၂ ဦး ထပ်မံဖမ်းဆီးရမိခဲ့ကြောင်း သိရသည်။

.

.

တောင်ကြီးခရိုင်ရဲတပ်ဖွဲ့၊ မှုခင်းနှိမ်နင်းရေးတပ်ဖွဲ့ဝင်များ ပါဝင်သော ပူးပေါင်းအဖွဲ့သည် ယနေ့ ဇွန်လ ၂၁ ရက်၊ နံနက် ၁၁ နာရီခန့်က တောင်ကြီးမြို့၊ ကျောင်းကြီးစုရပ်ကွက်၊ နယ်မြေ (၁၃)၊ ကျောက်တလုံးကြီး လမ်းမကြီးပေါ်တွင် ပိတ်ဆို့စစ်ဆေးဆောင်ရွက်နေစဉ် ယင်းလမ်းအတိုင်း တောင်ဘက်မှ မြောက်ဘက်သို့ ခွန်ကျော်ဝေဖြိုး (ခ) ဖြိုးနှင့် နေမျိုးထွန်း (ခ) တက်တိုး တို့ စီးနင်းလိုက်ပါလာသည့် Honda Wave-110 ဆိုင်ကယ်အား ရပ်တန့်စစ်ဆေးရှာဖွေရာ ဆိုင်ကယ်မောင်းနှင်သူ ခွန်ကျော်ဝေဖြိုး (ခ) ဖြိုး လွယ်ထားသော အနက်ရောင်လွယ်အိတ်အတွင်းမှ စိတ်ကြွမူးယစ်ဆေးဝါးဟု ယူဆရသော WY စာတမ်းပါ လိမ္မော်ရောင် ဆေးပြား ၃၀၀၀၀ ပြား၊ စုစုပေါင်းအလေးချိန် ၂ ဒသမ ၇ ကီလိုဂရမ်ခန့်အား ဖမ်းဆီးရမိခဲ့ခြင်း ဖြစ်ကြောင်း သိရသည်။

.

ထို့နောက် ဖမ်းဆီးရမိသူများအား စစ်ဆေးချက်အရ အဆိုပါ မူးယစ်ဆေးဝါး များအား ပိုလိုနိုင်း (ခ) ဗိုလ်လိုနိုင်းနှင့် အောင်မြတ် (ခ) ဒေဝတို့ ၂ ဦးထံမှ ဝယ်ယူရရှိခဲ့သော ပစ္စည်းများဖြစ်ပြီး ၎င်းတို့ ၂ ဦးမှာ မီးပုံးပျံကွင်း ဘူတာလမ်းမပေါ်တွင် VIGO ကား အနက်ရောင်ဖြင့် စောင့်ဆိုင်းနေကြာင်းသိရသဖြင့် လိုက်လံ ရှာဖွေရာ TOYOTA HILUX VIGO 2007 အမျိုးအစား အနက်ရောင် မော်တော်ယာဉ်နှင့် အတူ ပိုလိုနိုင်း (ခ) ဗိုလ်လိုနိုင်း နှင့် အောင်မြတ် (ခ) ဒေဝတို့အား တွေ့ရှိဖမ်းဆီးရမိခဲ့ကြောင်း သိရသည်။

.

အဆိုပါ စိတ်ကြွရူးသွပ်ဆေးပြားများ ဖမ်းဆီးရမိမှုနှင့် ပတ်သက်၍ ၎င်းတို့ ၄ ဦးအား ‌တောင်ကြီးမြို့မရဲစခန်း တွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေဖြင့် အမှုဖွင့်စစ်ဆေး ဆောင်ရွက်လျက်ရှိကြောင်း သိရသည်။

.

#ShanGazette #Taunggyi #Drugs

.