ရှမ်းပြည်နယ်သတင်းများ
.
တောင်ကြီး၊ ဒီဇင်ဘာ ၂၃
.
ရှမ်းပြည်နယ်မြို့တော်၊ တောင်ကြီးမြို့၏ အရှေ့ဘက်
တောင်တန်းပေါ်ရှိ ချယ်ရီပန်းပင်များတွင် “ချယ်ရီပန်း မခူးရ” သတိပေးဆိုင်းဘုတ် ဗီနိုင်းများကို
ကပ်ထားခဲ့သည်ဟု သိရသည်။
.
Cherry Campaing အတွက် ဗီနိုင်းအချပ်ရေ ၃၀ အဖြစ်
မြစိမ်းတောင်တကြောနှင့် စူဠာမုနိစေတီတော် အနီးရှိ ချယ်ရီပန်းပင်များတွင် ချယ်ရီပန်းမခူးရန်
မေတ္တာရပ်ခံစာများကို တောင်ကြီးဒေသခံ ချယ်ရီချစ်သူ များက လိုက်လံကပ်ခဲ့ခြင်းဖြစ်ကြောင်း
သိရသည်။
.
ရွာငံ၊ ဒီဇင်ဘာ ၂၃
.
ရှမ်းပြည်နယ်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊
ရွာငံမြို့နယ်တွင် ယမန်နေ့ ဒီဇင်ဘာလ ၂၂ ရက်၊ နံနက်ပိုင်းက ငွေကျပ်သိန်း ၄၀၀၀
တန်ဖိုးရှိ စိတ်ကြွရူးသွပ်ဆေးပြားများအား ဖမ်းဆီးရမိခဲ့ကြောင်း သိရသည်။
.
မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ
တပ်ဖွဲ့ဝင်များပါဝင်သော ပူးပေါင်းအဖွဲ့သည် ဒီဇင်ဘာလ ၂၂ ရက်၊ နံနက် ၉ နာရီခန့်က ရွာငံမြို့နယ်၊
မြို့ကြီးကျေးရွာအနီးတွင် မော်တော်ယာဉ်များအား စစ်ဆေးရှာဖွေစဉ် သန်းစိုးဝင်း
မောင်းနှင်လာသည့် HYUNDAI PORTER အမျိုးအစား မော်တော်ယာဉ်အား
ရပ်တန့်စစ်ဆေး ရှာဖွေရာ ယာဉ်ပေါ်မှ စိတ်ကြွရူးသွပ်ဆေးပြား ၄၀၀၀၀၀ ပြား၊ ဒေသကာလတန်ဖိုးငွေကျပ်သိန်း
၄၀၀၀အား တွေ့ရှိသိမ်းဆည်းရမိခဲ့ခြင်း ဖြစ်ကြောင်း သိရသည်။
.
လားရှိုး၊
ဒီဇင်ဘာ ၂၂
.
ရှမ်းပြည်နယ်မြောက်ပိုင်း၊
လားရှိုးမြို့ပေါ်ရှိ နေရာအချို့တွင် ယမန်နေ့ ဒီဇင်ဘာလ ၂၁ ရက်၊ ညနေပိုင်းက ပေါက်ကွဲမှုများ
ဖြစ်ပွားခဲ့ကြောင်း သိရသည်။
.
လားရှိုးမြို့၊
ရပ်ကွက် (၅) နှင့် ရပ်ကွက် (၂) တို့တွင် ယမန်နေ့ညနေ ၅ နာရီခန့်က ပေါက်ကွဲမှုများ ဆက်တိုက်
ဖြစ်ပွားခဲ့ခြင်းဖြစ်ပြီး ယင်းနေ့ နံနက်ပိုင်းကလည်း လားရှိုးမြို့၊ မန်ဆူဘုရားအနီးတွင်
ပေါက်ကွဲမှုတစ်ခု ဖြစ်ပွားခဲ့သေးကြောင်း သိရသည်။
.
ကလော၊ ဒီဇင်ဘာ ၂၂
.
ရှမ်းပြည်နယ်တောင်ပိုင်း၊ ကလောမြို့တွင် ပထမဦးဆုံးအကြိမ်အဖြစ်
ပန်းပွဲတော်ကို ၂၀၂၆ ခုနှစ်၊ ဇန်နဝါရီလ ၁ ရက်မှ ၁၅ ရက်အထိ ကျင်းပပြုလုပ်သွားမည်ဖြစ်ကြောင်း
သိရသည်။
.
အဆိုပါ ပန်းပွဲတော်ကို ကလောမြို့၊ မောမြေဦးပန်းခြံတွင်
ပြုလုပ်သွားမည်ဖြစ်ပြီး ဝင်ကြေးအခမဲ့ဖြစ်ကြောင်း သိရသည်။
.
မူဆယ်၊ ဒီဇင်ဘာ ၂၀
.
ရှမ်းပြည်နယ်မြောက်ပိုင်း၊ မူဆယ်မြို့တွင် ယမန်နေ့
ဒီဇင်ဘာလ ၁၉ ရက်၊ နံနက်ပိုင်းက တန်ဖိုးငွေကျပ် ၂၂၃ ခန့် တန်ဖိုးရှိ ဘိန်းဖြူနှင့် စိတ်ကြွရူးသွပ်ဆေးပြားများ
ဖမ်းဆီးရမိခဲ့ကြောင်း သိရသည်။
.
မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ
တပ်ဖွဲ့ဝင်များပါဝင်သော ပူးပေါင်းအဖွဲ့သည် ဒီဇင်ဘာလ ၁၉ ရက်၊ နံနက် ၁၀၅၀ အချိန်ခန့်က သက်သေများနှင့်အတူ
မူဆယ်မြို့၊ ကောင်းမှုတုံရပ်ကွက်နေ ထွန်းထွန်းနိုင် ၏ နေအိမ်အား ဝင်ရောက်ရှာဖွေရာ
နေအိမ်အတွင်းမှ ဘိန်းဖြူ အလေးချိန် ၃၇၀ ဂရမ်၊ ဒေသကာလတန်ဖိုး ငွေကျပ် ၅၅.၅ သိန်း၊
စိတ်ကြွရူးသွပ်ဆေးပြား ၁၆,၇၅၀ ပြား၊ ဒေသကာလတန်ဖိုးငွေကျပ်
၁၆၇.၅ သိန်း အား သိမ်းဆည်းရမိခဲ့ကြောင်း သိရသည်။
.
ကျိုင်းတုံ၊ ဒီဇင်ဘာ ၁၈
.
ရှမ်းပြည်နယ်အရှေ့ပိုင်း၊ ကျိုင်းတုံမြို့တွင် ယနေ့
ဒီဇင်ဘာလ ၁၈ ရက်၊ နေ့လယ်ပိုင်းက အိမ်စီးကားတစ်စီး မီးလောင်မှုဖြစ်ပွားခဲ့ကြောင်း သိရသည်။
.
ကျိုင်းတုံမြို့၊ ရပ်ကွက် (၂)၊ မိုင်တိုင်အမှတ်
(၃၉၄/၄)နှင့် (၃၉၄/၅) အကြားတွင် ယနေ့ ဒီဇင်ဘာလ ၁၈ ရက်၊ နေ့လယ် ၁၁ နာရီခန့်က PAJERO
အမျိုးအစား အဖြူရောင် အိမ်စီးကားတစ်စီး မီးလောင်မှုဖြစ်ပွားခဲ့ခြင်း
ဖြစ်ပြီး မီးလောင်မှုဖြစ်ပွားရာသို့ ကျိုင်းတုံခရိုင်/မြို့နယ်မီးသတ်စခန်းမှ
မီးငြှိမ်းသတ်ယာဉ် ၁ စီး၊ သန္ဓေမီးသတ်တပ်ဖွဲ့ဝင်များ၊
အရန်မီးသတ်တပ်ဖွဲ့ဝင်များဖြင့် ထွက်ခွာငြှိမ်းသတ်ခဲ့ရာ ၁၁ ၁၁ အချိန်တွင် မီးငြိမ်းသွားခဲ့ကြောင်း
မီးသတ်တပ်ဖွဲ့က ထုတ်ပြန်ထားသည်။
.
တောင်ကြီး၊ ဒီဇင်ဘာ ၁၇
.
တောင်ကြီးမြို့၊ ကျောင်းကြီးစုရပ်ကွက်အတွင်းရှိ
ဂနိုင်ရေကန်များအတွင်းသို့ ဆောင်းခိုငှက်များ စတင် ဝင်ရောက်နားခိုလာနေကြောင်း သိရသည်။
.
.jpg)
.
အဆိုပါ ဆောင်းခိုငှက်များ ဂနိုင်ကန်အတွင်းသို့ ရောက်ရှိသည်မှာ
၃ ရက်ခန့်ရှိနေပြီဖြစ်ပြီး ငှက်အကောင်ရေ ရာနှင့်ချီ ရှိကြောင်းသိရသည်။
.
ဆီဆိုင်၊ ဒီဇင်ဘာ ၁၇
.
ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊
ဆီဆိုင်မြို့ရှိ မြို့မဈေး ယာယီဆိုင်ခန်းတစ်ခု တွင် ယမန်နေ့ ဒီဇင်ဘာလ ၁၆ ရက်၊ ညပိုင်းက
မီးလောင်မှုဖြစ်ပွားခဲ့ကြောင်း သိရသည်။
.
ဆီဆိုင်မြို့၊ သီရိရပ်ကွက်၊ မြို့မဈေး ယာယီဆိုင်ခန်းအတွင်းရှိ
သင်္ကန်းဆိုင်တစ်ခုတွင် ယမန်နေ့ ဒီဇင်ဘာလ ၁၆ ရက်၊ ည ၈ နာရီခွဲခန့်က မီးလောင်မှုဖြစ်ပွားခဲ့ခြင်းဖြစ်ပြီး
မီးလောင်မှုကြောင့် သင်္ကန်းအရောင်းဆိုင် ၈ ပေ ဆိုင်ခန်း ၂ ခန်း မီးလောင်ပျက်စီးခဲ့ကြောင်း
သိရသည်။
.
အေးသာယာ၊ ဒီဇင်ဘာ ၁၆
.
တောင်ကြီးမြို့နယ်၊ အေးသာယာမြို့၊ ထုံးဖိုရှိ တပင်ရွှေထီး စက်သုံးဆီအရောင်းဆိုင်တွင် ယနေ့ ဒီဇင်ဘာလ ၁၆ ရက် နေ့လယ်ပိုင်းက မီးလောင်မှု ဖြစ်ပွားခဲ့ရာ အမျိုးသားတစ်ဦး ထိခိုက်ဒဏ်ရာ (မစိုးရိမ်ရ) ရရှိခဲ့ပြီး စက်သုံးဆီဆိုင်နှင့် ဆီဘောက်ဆာ တွဲယာဉ်တစ်စီး မီးလောင်ပျက်စီးခဲ့ကြောင်း သိရသည်။
.
.
အေးသာယာမြို့၊ နယ်မြေ (၂)၊ ရပ်ကွက် (၅) ရှိ တပင်ရွှေထီး စက်သုံးဆီအရောင်းဆိုင်တွင် ယနေ့ ဒီဇင်ဘာလ ၁၆ ရက်၊ နေ့လယ် ၁၂ နာရီခွဲခန့်က ဆီဘောက်ဆာယာဉ်မှ ဆီကန်အတွင်းသို့ ဆီဖြည့်ရာမှတစ်ဆင့် မီး ကူးစက် လောင်ကျွမ်းခဲ့ခြင်းဖြစ်ကြောင်း သိရသည်။
.
တောင်ကြီးမြို့နယ်၊ အေးသာယာမြို့၊ ထုံးဖိုရှိ စက်သုံးဆီအရောင်းဆိုင်တစ်ခုတွင် ယနေ့ ဒီဇင်ဘာလ ၁၆ ရက် နေ့လယ် ၁၂ နာရီခွဲခန့်က မီးလောင်မှု ဖြစ်ပွားလျက်ရှိကြောင်း သိရသည်။
.
.
မီးလောင်မှု ဖြစ်ပွားသည့်ဆိုင်မှာ တပင်ရွှေထီး စက်သုံးဆီဆိုင်ဖြစ်ကြောင်း ဒေသခံများက ပြောဆိုကြပြီး မီးလောင်ရသည့် အကြောင်းအရင်းနှင့် ပျက်စီးဆုံးရှုံးမှု အခြေအနေများကို မသိရှိရသေးချေ။
.
မူဆယ်၊ ဒီဇင်ဘာ ၁၅
.
ရှမ်းပြည်နယ်မြောက်ပိုင်း၊ မူဆယ်မြို့နယ်၊ မူဆယ်-၁၀၅
မိုင်ကြား ပြည်ထောင်စုလမ်းမပေါ်တွင် ယမန်နေ့ ဒီဇင်ဘာလ ၁၄ ရက်၊ နေ့လယ်ပိုင်းက ဗြုန်းကျောက်တင်ကားတစ်စီး
ဘရိတ်ပေါက်ပြီး ဝင်ရောက်တိုက်မိရာမှ အမျိုးသမီး ၂ ဦးသေဆုံးကာ ၈ ဦး ဒဏ်ရာရရှိခဲ့ကြောင်း
သိရသည်။
.
မူဆယ်မြို့နယ်၊ ၁၀၅ မိုင်အဝင်ရှိ စစ်ဆေးရေးဂိတ်တွင်
ယမန်နေ့ နေ့လယ် ၂ နာရီခွဲအချိန်ခန့်က ဗြုန်းကျောက်တင် ၆ ဘီးယာဉ်မှ ဘရိတ်ပေါက်ကာ စစ်ဆေးရေးဂိတ်တွင်
လမ်းလျှောက်နေသည့် ခရီးသွားများကို ဝင်ရောက်တိုက်မိပြီး တိမ်းမှောက်ခဲ့ခြင်းဖြစ်ကြောင်း
သိရသည်။
.
တောင်ကြီး၊ ဒီဇင်ဘာ ၁၄
.
နိုင်ငံဝန်ထမ်းဟောင်းများ (မြို့ပြ) အသင်း၊ တောင်ကြီးက
အလှူရှင်များအား ဂုဏ်ပြုမှတ်တမ်းလွှာ ပေးအပ်ပွဲနှင့် အသင်းသားတွေ့ဆုံအစည်းအဝေးကို ယနေ့
ဒီဇင်ဘာလ ၁၄ ရက်၊ နေ့လယ်ပိုင်းက တောင်ကြီးမြို့၊ လူထုအခြေပြု ဗဟိုဌာန၊ အစည်းအဝေးခန်းမတွင်
ပြုလုပ်ခဲ့သည်ဟု သိရသည်။
.
အစည်းအဝေးတွင် နိုင်ငံ့ဝန်ထမ်းဟောင်းများ (မြို့ပြ)
အသင်း တောင်ကြီး ဥက္ကဋ္ဌ၊ ရှမ်းပြည်နယ်ဥပဒေချုပ်၊ ဦးစိုင်းကျော်ဇံ က အဖွင့်အမှာစကား
ပြောကြားခဲ့ပြီး အသင်းအတွင်းရေးမှူး ဒေါ်ရွှေရွှေမြင့်က ယခင်အစည်းအဝေး ဆုံးဖြတ်ချက်များအပေါ်
ဆောင်ရွက်ပြီးစီးမှုအခြေအနေနှင့် ဆက်လက်ဆောင်ရွက်မည့် အစီအစဉ်များ၊ အသင်း၏ ဘဏ္ဍာရေးဆိုင်ရာများကို
ဖတ်ကြားရှင်းလင်းခဲ့သည်။
.
ညောင်ရွှေ၊ ဒီဇင်ဘာ ၁၃
.
ရှမ်းပြည်နယ်တောင်ပိုင်း၊ ကလောခရိုင်၊
ညောင်ရွှေမြို့နယ်၊ အင်းလေးဒေသ၊ မန်ကျည်းဆိပ်ကျေးရွာတွင် U9 Cares မှ လှူဒါန်းသည့် ရေသန့်စင်စက် လွှဲပြောင်းပေးအပ်လှူဒါန်းပွဲကို ယမန်နေ့
ဒီဇင်ဘာလ ၁၂ ရက်က အဆိုပါကျေးရွာရှိ ဘုန်းတော်ကြီးကျောင်းဝင်းအတွင်း
ကျင်းပပြုလုပ်ခဲ့ကြောင်း သိရသည်။
.
အခမ်းအနားတွင် ဆရာတော်၊ သံဃာတော်များအား
နေ့ဆွမ်းဆက်ကပ်လှူဒါန်းပြီး အင်းလေးဒေသ၊ နန်းပန် ကျောင်းတိုက် ဆရာတော်က
ရေသန့်စင်စက် လှူဒါန်းမှုနှင့် ပတ်သက်၍ အနုမောဒနာတရား ဟောကြားခဲ့ပြီး U9
Cares မှ တာဝန်ရှိသူများနှင့် အခမ်းအနားတက်ရောက်လာသူများ၊
ဒေသခံများက ရေစက်ချတရားတော် နာယူခဲ့သည်။
.
တောင်ကြီး၊ ဒီဇင်ဘာ ၆
.
ရွေးကောက်ပွဲ အပိုင်း (၁) နှင့် အပိုင်း (၂) ကျင်းပမည့်
ရှမ်းပြည်နယ်အတွင်းရှိ မြို့နယ် ၁၁ ခုမှ ရပ်ကွက်နှင့် ကျေးရွာအုပ်စု စုစုပေါင်း ၂၁၂
ခုတို့တွင် ရွေးကောက်ပွဲ ကျင်းပနိုင်မည်မဟုတ်ကြောင်း ပြည်ထောင်စု ရွေးကောက်ပွဲကော်မရှင်က
ယမန်နေ့ ဒီဇင်ဘာလ ၅ ရက်က ကြေညာခဲ့သည်ဟု သိရသည်။
.
ရွေးကောက်ပွဲ အပိုင်း
(၁) ကျင်းပရန်ရှိနေသည့် နောင်ချိုမို့နယ်မှ ကျေးရွာအုပ်စု ၄ စု၊ မူဆယ်မြိုနယ်
မုံးကိုးမြို့မှ ရပ်ကွက် ၇ ခု၊ မန်ဟီးရိုးမြို့ရှိ ရပ်ကွက် ၃ ခု၊ ပန်ဆိုင်း
(ကြူကုတ်)မှ ရပ်ကွက် ၅ ခုနှင့် ကျေးရွာ အုပ်စု ၆၃ စု၊ လားရှိုးမြို့နယ်ရှိ
ကျေးရွာအုပ်စု ၆၄ စုတို့၌ ရွေးကောက်ပွဲ ကျင်းပနိုင်မည် မဟုတ်ကြောင်း UEC ၏ ထုတ်ပြန်ချက်တွင် ဖော်ပြထားသည်။
.
အောင်ပန်း၊ ဒီဇင်ဘာ ၆
.
ရှမ်းပြည်နယ်တောင်ပိုင်း၊ ကလောမြို့နယ်၊ အောင်ပန်းမြို့တွင်
ယနေ့ ဒီဇင်ဘာလ ၆ ရက်၊ နံနက်ပိုင်းက ခရီးသည်တင် Express ယာဉ်နှင့်
Nissan Atlas အမျိုးအစား မော်တော်ယာဉ်တို့ တိုက်မိမှု ဖြစ်ပွားခဲ့ကြောင်း
သိရသည်။
.
အောင်ပန်းမြို့၊ ပြည်ထောင်စုလမ်းမကြီး၊ မိုင်တိုင်အမှတ်
(၇၈/၅) နှင့် (၇၈/၆) အကြားတွင် ယနေ့ ဒီဇင်ဘာ လ ၆ ရက်၊ နံနက် ၈ နာရီခွဲခန့်က ယာဉ်တိုက်မှု
ဖြစ်ပွားခဲ့ခြင်းဖြစ်ပြီး ယာဉ်တိုက်မှုကြောင့် Nissan Attlas ယာဉ်ပေါ်မှ အမျိုးသမီး ၂ ဦး ညှပ်နေသဖြင့် အောင်ပန်းမီးသတ်တပ်ဖွဲ့စခန်းမှ ရှာဖွေကယ်ဆယ်ရေး
လုပ်ငန်း များ သွားရောက်ကူညီဆောင်ရွက်ပေးခဲ့ကြောင်း သိရသည်။
.
တောင်ကြီး၊ ဒီဇင်ဘာ ၅
.
တောင်ကြီးမြို့၊ ရှမ်းပြည်နယ်အားကစားကွင်း ပတ်လည်တွင်
တည်ဆောက်ထားသော ဆိုင်ခန်း/တိုက်ခန်း များအား ဖယ်ရှားရှင်းလင်းသွားရန် ပြည်နယ်အားကစားနှင့်
ကာယပညာဦးစီးဌာနက ဒီဇင်ဘာလ ၃ ရက်တွင် အကြောင်းကြားထားသည်ဟု သိရသည်။
.
ပြည်နယ်ဘောလုံးကွင်း ပတ်လည်ရှိ အား/ကာဌာနပိုင် မြေပေါ်တွင်
ငှားရ၎်းထားသော ဆိုင်ခန်း/တိုက်ခန်း များအား ဆက်လက်ငှားရ၎်းခြင်း မပြုတော့ကြောင်းနှင့်
ဒီဇင်ဘာလ ၁ ရက်မှ စတင်၍ ဆိုင်ခန်း/တိုက်ခန်း လစာများ ကောက်ခံခြင်း မပြုတော့ကြောင်း
ဆိုင်ခန်းရှင်များသို့ အကြောင်းကြားသည့် စာတွင် ဖော်ပြ ထားသည်။
.
တောင်ကြီး၊ ဒီဇင်ဘာ ၄
.
တောင်ကြီးမြို့နယ်၊ ကက္ကူကျေးရွာအုပ်စု၊ ကက္ကူလမ်းခွဲ
လမ်းပိုင်းတွင် ယနေ့ ဒီဇင်ဘာလ ၄ ရက်၊ ညနေ ၃ နာရီခန့်က မော်တော်ဆိုင်ကယ်နှင့် ၆ ဘီးယာဉ်
တိုက်မိမှုတစ်ခု ဖြစ်ပွားခဲ့ကြောင်း သိရသည်။
.
အဆိုပါ ယာဉ်တိုက်မှုကြောင့် ဆိုင်ကယ်မောင်းနှင်သူ
အမျိုးသားမှာ သေဆုံးခဲ့ပြီး ဆိုင်ကယ်နောက်တွင် လိုက်ပါလာသူ အမျိုးသမီးတစ်ဦး ထိခိုက်ဒဏ်ရာရရှိခဲ့ကြောင်း
သိရသည်။
.
လားရှိုး၊ နိုဝင်ဘာ ၁၈
.
ရှမ်းပြည်နယ်မြောက်ပိုင်း၊ လားရှိုးမြို့ရှိ အမှတ် (၆) အခြေခံပညာ အထက်တန်းကျောင်းတွင် ယနေ့ နိုဝင်ဘာလ ၁၈ ရက်က စာကြည့်တိုက်များဖွံ့ဖြိုးတိုးတက်ရေးနှင့် စာဖတ်ရှိန်မြှင့်တင်ရေးပွဲတော်ကို ကျင်းပပြုလုပ်ခဲ့သည်ဟုသိရသည်။
.
.
ရှမ်းပြည်နယ်အစိုးရအဖွဲ့၏ ဦးဆောင်မှုဖြင့် တွဲဖက်ပြည်နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် အခြေခံပညာ ဦးစီးဌာနတို့ ပူးပေါင်းဆောင်ရွက်ခြင်းဖြစ်ကြောင်း သိရသည်။
.
တောင်ကြီး၊ နိုဝင်ဘာ ၁၈
.
ဘင်္ဂလား ပင်လယ်အော်အနောက်တောင်ပိုင်းနှင့် ယင်းနှင့်ဆက်စပ်လျက်ရှိသော သီရိလင်္ကာနိုင်ငံကမ်းရိုးတန်းတွင် ဖြစ်ပေါ်နေသော လေဖိအားနည်းရပ်ဝန်း (Low Pressure Area) ၏ အရှိန်ကြောင့် ယနေ့ နိုဝင်ဘာလ ၁၈ ရက်၊ နေ့လယ်ပိုင်းတွင် တောင်ကြီးမြို့၌ အချိန်အခါမဟုတ် မိုးရွာသွန်းလျက်ရှိသည်။
.
.
လေဖိအားနည်းရပ်ဝန်းသည် နောက် ၂၄ နာရီ အတွင်း အနောက်- အနောက်မြောက်ဘက်သို့ ဖြည်းညင်းစွာ ရွေ့လျားနိုင်သည်ဟု ခန့်မှန်းရပြီး ဘင်္ဂလားပင်လယ်အော် မြောက်ပိုင်းနှင့် အနောက်အလယ်ပိုင်းတို့တွင် တိမ်အနည်းငယ် ဖြစ်ထွန်းနေပြီး၊ ကပ္ပလီပင်လယ်ပြင်နှင့် ကျန်ဘင်္ဂလား ပင်လယ်အော်တို့တွင် တိမ်အသင့်အတင့် ဖြစ်ထွန်းနေကြောင်း မိုးလေဝသနှင့် ဇလဗေဒဦးစီးဌာနက ထုတ်ပြန်ထားသည်။
.
တောင်ကြီး၊ နိုဝင်ဘာ ၁၈
.
၂၁၂၀ ခုနှစ်၊ ရှမ်းနှစ်သစ်ကူး အထိမ်းအမှတ်အဖြစ် တောင်ကြီးမြို့၊
လွယ်လုံပရဟိတကျောင်းမှ ၂၀၂၄-၂၀၂၅ ပညာသင်နှစ် တက္ကသိုလ်ဝင်စာမေးပွဲအောင် ကျောင်းသား/ကျောင်းသူများကို
ဆုများ ပေးအပ်ချီးမြှင့်သွားမည် ဖြစ်ကြောင်း သိရသည်။
.
ရှမ်းနှစ်သစ်ကူးပွဲတော် အထိမ်းအမှတ်အဖြစ် တောင်ကြီးမြို့၊
လွယ်လုံပညာဗောဓိပရဟိတကျောင်းတွင် တန်ဆောင်မုန်းလပြည့်ကျော် ၁၅ ရက် (လကွယ်နေ့)၊
(၁၉-၁၁-၂၀၂၅) ရက်နေ့ ညနေပိုင်းမှ စတင်၍ စကားရည်လုပွဲ၊ ရှမ်းရိုးရာကိန္နရီ၊ ကိန္နရာအကများ
ကပြဖျော်ဖြေခြင်း၊ ရှမ်းအစားအစာများဖြင့် ဧည့်ခံ ကျွေးမွေးခြင်းတို့ကို ပြုလုပ်သွားမည်ဖြစ်ပြီး
ည ၁၁ နာရီခွဲအချိန်တွင် ဘုရားရှိခိုး မေတ္တာပို့ကာ နှစ်ဟောင်းကို နှုတ်ဆက်၍ နှစ်သစ်ကြိုဆိုသွားမည်ဖြစ်ကြောင်း
သိရသည်။
.
လားရှိုး၊
နိုဝင်ဘာ ၁၅
.
ရှမ်းပြည်နယ်မြောက်ပိုင်း၊
လားရှိုးမြို့တွင် ကိုးကန့်တပ် MNDAA
က ဖမ်းဆီးထားသည့် စစ်သုံ့ပန်း ၂၀၀ ကျော်ကို ယနေ့ နိုဝင်ဘာလ ၁၅ ရက်၊ နံနက်ပိုင်းက
ပြန်လွှတ်ပေးခဲ့သည်ဟု သိရသည်။
.
ယခင်
တိုက်ပွဲများအတွင်း ဖမ်းဆီးထားသည့် စစ်သုံ့ပန်း ၂၀၂ ဦးကို MNDAA
က ယနေ့ နံနက်ပိုင်းတွင်
လားရှိုးမြို့နယ်၊ ဟိုပိတ်ရွာဘက်မှ ပြန်လွှတ်ပေးခဲ့ခြင်းဖြစ်ကြောင်း သိရသည်။
.
ဟိုပန်၊ နိုဝင်ဘာ ၁၅
.
“ဝ” ပြည်သွေးစည်းညီညွတ်ရေးတပ်မတော် (UWSA) ထိန်းချုပ်ထားသည့်
ဟိုပန်မြို့တွင် ယမန်နေ့ နိုဝင်ဘာလ ၁၄ ရက်က လူသတ်မှုကျူးလွန်သူတစ်ဦးကို သေဒဏ်ချမှတ်ခဲ့သည်ဟု
သိရသည်။
.
ဟိုပန်မြို့၊ ယဉ်ကျေးမှုကွင်းတွင် ယမန်နေ့က ကျင်းပခဲ့သည့် တရားစီရင်ရေး
အခမ်းအနား၌ လူသတ်မှု ကျူးလွန်သူအပြင် ရွှေဆိုင်ဖောက်ထွင်းသူတစ်ဦးကိုလည်း ထောင်ဒဏ်
၁၅ နှစ် ချမှတ်ခဲ့သည်ဟု သိရသည်။
.
အောင်ပန်း၊ နိုဝင်ဘာ ၁၃
.
ရှမ်းပြည်နယ်တောင်ပိုင်း၊ ကလောမြို့နယ်၊ အောင်ပန်းမြို့တွင်
ယမန်နေ့ နိုဝင်ဘာလ ၁၃ ရက်၊ ညပိုင်းက ကားနှင့် မော်တော်ဆိုင်ကယ် တိုက်မိပြီး ဆိုင်ကယ်မောင်းသူတစ်ဦး
သေဆုံးကာ တစ်ဦး ပြင်းထန်ဒဏ်ရာ ရရှိခဲ့ကြောင်း သိရသည်။
.
အောင်ပန်း-တောင်ကြီးလမ်း၊ ကျောက်နွားတောင် မုခ်ဦးအနီးတွင်
ယမန်နေ့ နိုဝင်ဘာလ ၁၂ ရက်၊ ည ၇ နာရီခွဲခန့်က အောင်ပန်းမြို့၊ သာမိုင်းခမ်းအုပ်စု၊ ဖောင်းသင်ရွာနေ
လူငယ်အမျိုးသား ၂ ဦး မောင်းနှင်လာသော မော်တော်ဆိုင်ကယ်နှင့် အမျိုးအမည် မသိရှိရသေးသည့်
ကားတို့ တိုက်မိခဲ့ခြင်းဖြစ်ပြီး ကားမှာ မောင်းနှင် ထွက်ပြေးသွားခဲ့ခြင်းဖြစ်ကြောင်း
သိရသည်။
.
မိုင်းရှူး၊ နိုဝင်ဘာ
၁၁
.
ရှမ်းပြည်နယ်တောင်ပိုင်း၊ မိုင်းရှူးမြို့တွင် ယမန်နေ့
နိုဝင်ဘာလ ၁၀ ရက်၊ ညနေပိုင်းက ရွှေဆိုင်တစ်ဆိုင် ဓါးပြတိုက်ခံရမှု ဖြစ်ပွားခဲ့ကြောင်း
သိရသည်။
.
မိုင်းရှူးမြို့၊ ရပ်ကွက် (၃)၊ မြို့မဈေးအရှေ့ဘက်ရှိ
ရွှေဆိုင်တစ်ဆိုင်သို့ ယမန်နေ့ နိုဝင်ဘာလ ၁၀ ရက်၊ ညနေ ၄ နာရီခန့်က အမည်မသိအမျိုးသား
၂ ဦး ရောက်ရှိလာပြီး သေနတ်ဖြင့် ဓါးပြတိုက်ခဲ့ခြင်းဖြစ်ကြောင်း သိရသည်။
.
လားရှိုး၊ နိုဝင်ဘာ ၁၁
.
ရှမ်းပြည်နယ်မြောက်ပိုင်း၊ လားရှိုးမြို့တွင် ယနေ့
နိုဝင်ဘာလ ၁၁ ရက်၊ နံနက် ၉ နာရီ ၅၅ မိနစ်ခန့်က မီးလောင်မှုတစ်ခု ဖြစ်ပွားခဲ့ကြောင်း
သိရသည်။
.
လားရှိုးမြို့၊ ရပ်ကွက် (၉)၊ နယ်မြေ (၂)၊ ဆင်တောင်လမ်းရှိ
ကုန်စုံဆိုင်တစ်ခုတွင် မီးလောင်မှုဖြစ်ပွားခဲ့ခြင်း ဖြစ်ပြီး မီးလောင်မှုဖြစ်ပွားရာသို့
လားရှိုးခရိုင်မီးသတ်စခန်းမှ အုပ်ချုပ်မှုယာဉ် ၁ စီး၊ ရေသယ်ယာဉ် ၁ စီး၊
လားရှိုးမြို့နယ်မီးသတ်စခန်းမှ မီးငြှိမ်းသတ်ယာဉ် ၂ စီး၊ ရေသယ်ယာဉ် ၁ စီး၊
သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့်
သွားရောက်ငြှိမ်းသတ်ခဲ့ရာ နံနက် ၁၀ နာရီ ၂၀ ခန့်တွင် မီးငြိမ်းခဲ့ကြောင်း မီးသတ်တပ်ဖွဲ့က
ထုတ်ပြန်ထားသည်။
.
တောင်ကြီး နို၀င်ဘာ ၁၀
.
တောင်ကြီးမြို့၊ အမှတ် (၂) အခြေခံပညာအထက်
တန်းကျောင်း ကျောင်းသား ကျောင်းသူဟောင်းများ ဆရာကန်တော့ပွဲကို ယမန်နေ့ နို၀င်ဘာလ ၉
ရက်၊ နံနက်ပိုင်းက တောင်ကြီးမြို့၊ အောင်တော်မူ ကျောင်းတိုက်တွင် ပြုလုပ်ခဲ့ကြောင်း
သိရသည်။
.
ဆရာကန်တော့ပွဲအား ၁၉၉၉ မှ ၂၀၀၁ ခုနှစ်အတွင်း
အမှတ် (၂) အခြေခံပညာအထက်တန်းကျောင်းတွင် တက်ရောက်ပညာသင်ကြားခဲ့သည့် ကျောင်းသား/ကျောင်းသူဟောင်းများ
စုပေါင်း၍ ပြုလုပ်ခဲ့ခြင်း ဖြစ်ကြောင်း သိရသည်။
.
ကလော၊ နိုဝင်ဘာ ၉
.
ရှမ်းပြည်နယ်တောင်ပိုင်း၊ ကလောမြို့နယ်၊ ဝက်ဖြူရေကျေးရွာအနီးတွင်
ယနေ့ နိုဝင်ဘာလ ၉ ရက်၊ နေ့လယ်ပိုင်းက မော်တော်ယာဉ်တစ်စီး အရှိန်လွန်တိမ်းမှောက်ပြီး
၅ ဦး သေဆုံးမှု ဖြစ်ပွားခဲ့ကြောင်း သိရသည်။
.
.jpg)
သာစည်-ကလောပြည်ထောင်စုလမ်းမကြီး၊ ကလောမြို့နယ်၊ ဝက်ဖြူရေကျေးရွာနှင့် မဂွေကျေးရွာအကြား မိုင်တိုင်အမှတ် (၅၆/၆) တွင် ယနေ့ နိုဝင်ဘာလ ၉ ရက်၊ နေ့လယ် ၁ နာရီခွဲ အချိန်ခန့်တွင် တောင်ကြီးမှ မန္တလေးသို့ မောင်းနှင်လာသော JINBEI အမျိုးအစား မော်တော်ယာဉ်သည် ဘရိတ်ပေါက်ပြီး အရှိန် မထိန်းနိုင်ဘဲ လမ်း၏ ဝဲဘက်ရှိ ချောက်အတွင်းသို့ တိမ်းမှောက်မှုဖြစ်ပွားခဲ့ခြင်းဖြစ်ကြောင်း သိရသည်။
.
ရွှေညောင်၊ နိုဝင်ဘာ ၈
.
တောင်ကြီးမြို့နယ်၊ ရွှေညောင်မြို့၊ အောင်သပြေရပ်ကွက်၊
တပ်ဦးကျောင်းရှေ့တွင် ယနေ့ နိုဝင်ဘာလ ၈ ရက်၊ နံနက်ပိုင်းက အဝေးပြေး Express
ယာဉ်နှင့် မော်တော်ဆိုင်ကယ် တိုက်မိပြီး ဆိုင်ကယ်ပေါ်ပါ အမျိုးသား ၂
ဦး သေဆုံးမှု ဖြစ်ပွားခဲ့ကြောင်း သိရသည်။
.
ယနေ့ နိုဝင်ဘာလ ၈ ရက်၊ နံနက် ၄ နာရီခွဲခန့်က ကလောမြို့နယ်၊
ဘော်ဆိုင်းမြို့၊ ရွာသစ်နေ လူငယ် ၂ ဦး စီးလာသော မော်တော်ဆိုင်ကယ်သည် တောင်ကြီး တန်ဆောင်တိုင်ပွဲတော်မှ
ပြန်လာစဉ် အောင်သပြေ တပ်ဦးကျောင်းရှေ့အရောက်၌ ရန်ကုန်မှ တက်လာသော Express ယာဉ်နှင့် မျက်နှာချင်းဆိုင် တိုက်မိခဲ့ခြင်း ဖြစ်ကြောင်း သိရသည်။
.
တောင်ကြီး၊ နိုဝင်ဘာ ၇
.
တောင်ကြီးမြို့ပေါ်တွင် အမှိုက်နှင့်မိလ္လာသိမ်းဆည်းရေးလုပ်ငန်း
ဆောင်ရွက်နေသည့် တောင်ကြီးအီကို ကုမ္ပဏီ၏ အမှိုက်ခွန် ကောက်ခံမှုနှင့် ပတ်သက်၍ တောင်ကြီးဒေသခံများအကြား
ဝေဖန်မှု မြင့်တက် နေကြောင်း သိရသည်။
.
တောင်ကြီးအီကိုကမ္ပဏီက အမှိုက်ခွန် ကောက်ခံရာတွင်
အမှိုက်ခွန်ကြေး များပြားသလို ကောက်ခံမှု မှာလည်း ပွင့်လင်းမြင်သာမှုမရှိကြောင်း ဒေသခံများက
ဆိုသည်။
.
အေးသာယာ၊ နိုဝင်ဘာ ၆
.
ရှမ်းပြည်နယ်တောင်ပိုင်း၊ တောင်ကြီးမြို့နယ်၊ အေးသာယာမြို့တွင်
နိုဝင်ဘာလ ၄ ရက်၊ တန်ဆောင်မုန်း လပြည့်ညပိုင်းက ကြက်ခိုးယူသူကို ကြက်ပိုင်ရှင်သားအဖက
ဝိုင်းဝန်းရိုက်နှက်ရာမှ လူသေဆုံးမှုတစ်ခု ဖြစ်ပွားခဲ့ကြောင်း သိရသည်။
.
အေးသာယာမြို့၊ ရပ်ကွက် (၁)တွင် နိုဝင်ဘာလ ၄ ရက်၊
ည ၁၀ နာရီခွဲခန့်က လောတာ (ခ) စိုင်းထွန်းဆာ ဆိုသူသည် ၎င်း၏နေအိမ်မြောက်ဘက် ခြံချင်းကပ်လျက်ရှိ
ဦးစိုင်းရွှေထီး နေအိမ်ရှိ မန်ကျည်းပင်ပေါ်တွင် အိပ်တန်းဝင်နေသည့် ကြက်များအား ခိုးယူစဉ်
ဦးစိုင်းရွှေထီးနှင့် သားဖြစ်သူ စိုင်းကျော်စိုးမိုးတို့နှင့် အပြန်အလှန်စကားများရာမှ
ရိုက်နှက်ခဲ့ကြခြင်းဖြစ်ကြောင်း သိရသည်။
.
တောင်ကြီး၊ နိုဝင်ဘာ ၅
.
တောင်ကြီးမြို့၌ ကျင်းပ ပြုလုပ်လျက် ရှိသည့်
တန်ဆောင်တိုင်ပွဲတော်၊ မီးပုံးပျံပြိုင်ပွဲ၌ ပါဝင်ယှဥ်ပြိုင်မည့်
မီးပုံးပျံအဖွဲ့များ အနေဖြင့် နိုဝင်ဘာလ ၇ ရက် နောက်ဆုံးထား၍ အပြီးလွှတ်တင်ရမည်ဖြစ်ကြောင်း
ဒိုင်အဖွဲ့က ယနေ့ နိုဝင်ဘာလ ၅ ရက် ညပိုင်းတွင် သတ်မှတ်ကြေညာခဲ့သည်ဟု သိရသည်။
.
ယနေ့ နိုဝင်ဘာလ ၅ ရက်နေ့နှင့် နိုဝင်ဘာလ ၇
ရက်နေ့ ညပိုင်းတို့တွင် လွှတ်ရန် ကျန်ရှိသည့် ညမီးကြီး မီးပုံးပျံများကို
လည်းကောင်း၊ မနက်ဖြန် နိုဝင်ဘာလ ၆ ရက် ညပိုင်းတွင် စိန်နားပန်များကို လည်းကောင်း
အသီးသီး လွှတ်တင်ရမည်ဟု ဒိုင်အဖွဲ့က ကြေညာခဲ့ခြင်း ဖြစ်သည်။
.
တောင်ကြီး< နို၀င်ဘာ ၅
.
တောင်ကြီးတန်ဆောင်တိုင်ပွဲတော် ကာလအတွင်း နိုဝင်ဘာ
၁ ရက်နေ့မှစ၍ နေ့စဉ်မိုးရွာသွန်းမှု ရှိနေသည့် အတွက် နယ်ဝေးမှ လာရောက်ရောင်းချသည့်
ဈေးသည်များအနေဖြင့် ဆိုင်ခန်းခပြန်ရရန်ပင် မဖြစ်နိုင်ဘဲ အရှုံးပေါ်နေကြောင်း ဈေးသည်များထံကသိရသည်။
.
ပွဲတော်ကျင်းပရာ အဝေရာကွင်းအတွင်းသို့ လာရောက်လည်ပတ်သည့်
ဧည့်ပရိသတ် များပြားသော်လည်း မိုးရွာခြင်း၊ လေပြင်းတိုက်ခတ်ခြင်း နှင့် မြူမှုန်များကျဆင်းခြင်းတို့ကြောင့်
မီးပုံးပျံများ လွှတ်တင်နိုင်ခြင်း မရှိသည့်အတွက် ဈေးသည်များအနေဖြင့် ဈေးရောင်းချနိုင်ခြင်း
မရှိကြောင်း သိရသည်။
.
.
ဟိုပုံး၊ နိုဝင်ဘာ ၅
.
ပအိုဝ်းကိုယ်ပိုင်အုပ်ချူပ်ခွင့်ရဒေသ၊
ဟိုပုံးမြို့တွင် ကျင်းပမည့် ၁၃၈၇ ခုနှစ်၊ ဟိုပုံးတန်ဆောင်တိုင်ပွဲတော်
မီးထွန်းပွဲကို ရာသီဥတုအခြေအနေကြောင့် ၂ ရက် နောက်ဆုတ်ပြီး မူလသတ်မှတ်ထားသည့် တန်ဆောင်မုန်း
လဆုတ် ၄ ရက် (၁၀-၁၁-၂၀၂၅) ရက် အစား တန်ဆောင်မုန်းလဆုတ် ၆ ရက် (၁၀-၁၁-၂၀၂၅) တွင် စတင်
ကျင်းပသွားမည်ဖြစ်ကြေင်း သိရသည်။
.
မီးထွန်းပွဲတော်တွင် မီးပုံးပျံပြိုင်ပွဲကိုလည်း
ထည့်သွင်းကျင်းပသွားမည်ဖြစ်ပြီး ရာသီဥတု အခြေအနေ အရ ပြိုင်ပွဲဝင်ယှဉ်ပြိုင် လွှတ်တင်မည့်
ညမီးကြီးမီးပုံးပျံများ ပိုမိုအဆင်ပြေနိုင်ရေးအတွက် ရက်ပြောင်းလဲ သတ်မှတ်လိုက်ခြင်းဖြစ်ကြောင်း
သိရသည်။
.
.
လားရှိုး၊ နိုဝင်ဘာ ၂
.
ရှမ်းပြည်နယ်မြောက်ပိုင်း၊ လားရှိုးမြို့၊ အရှေ့ခါးရိုးပရိယတ္တိ
စာသင်တိုက်တွင် နိုဝင်ဘာလ ၂ ရက်၌ သုခကာရီ ဆွမ်းလောင်းအသင်းက (၁၉) ကြိမ်မြောက် ကထိန်သင်္ကန်း
ကပ်လှူခဲ့သည်ဟု သိရသည်။
.
လားရှိုးမြို့၊ ရပ်ကွက် (၉)၊ နယ်မြေ (၂) ရှိ အရှေ့ခါးရိုး
ပရိယတ္တိစာသင်တိုက်တွင် လားရှိုးမြိုပေါ်ရှိ သံဃာတော် ၁၇၅ ပါးနှင့် သီလရှင်ဆရာလေးများကို
ပင့်ဖိတ်ကာ ကထိန်သင်္ကန်း ကပ်လှူခဲ့ခြင်းဖြစ်ပြီး သံဃာတော်တစ်ပါးလျှင် အလှူငွေ တစ်သိန်းတစ်သောင်းကျပ်စီ
ဆက်ကပ်လှူဒါန်းခဲ့ခြင်းဖြစ်ကြောင်း အဆိုပါအသင်းမှ ဦးမြင့်ခိုင်ထံက သိရသည်။
.
တောင်ကြီး၊ နိုဝင်ဘာ ၃၀
.
တောင်ကြီးတန်ဆောင်တိုင်ပွဲတော် ဖွင့်ပွဲနေ့ဖြစ်သော
ယမန်နေ့ နိုဝင်ဘာလ ၂၉ ရက်တွင် ယာဉ်ရပ်နားခ ၅ သောင်းကျပ်အထိ ကောက်ခံခဲ့သည်ဟု သိရသည်။
.
“ဧည့်သည်များတာကို အခွင့်ကောင်းယူပြီး ကောက်ချင်သလိုကောက်ကြတာနေမှာပေါ့။
ကြပ်မတ်မယ့်သူ မရှိတာလည်း ဖြစ်မယ်ထင်တယ်။ ပေါင်းလုပ် ပေါင်းစားမျိုးဆိုရင်တော့
ဒီကိစ္စကမဖြစ်သင့်ဘူးထင်ပါတယ်” ဟု တောင်ကြီးမြို့ခံတစ်ဦးက ပြောသည်။
.
တောင်ကြီး၊ အောက်တိုဘာ ၂၃
.
တောင်ကြီးမြို့တော် တန်ဆောင်တိုင်ပွဲတော် မီးပုံးပျံပြိုင်ပွဲ
ကျင်းပနေစဉ်ကာလအတွင်း ကုန်တင်ယာဉ်များ အား တောင်ကြီးမြို့တွင်းသို့ ဝင်ရောက် ဖြတ်သန်းခွင့်
ပိတ်ပင်ထားမည်ဖြစ်ကြောင်း သိရသည်။
.
တောင်ကြီးတန်ဆောင်တိုင်ပွဲတော်အတွင်း ယာဉ်ကြောပိတ်ဆို့မှု
မဖြစ်ပေါ်စေရေးနှင့် ယာဉ်အန္တရာယ် လမ်း အန္တရာယ် ကင်းရှင်းစေရေးအတွက် တောင်ကြီးမြို့ပေါ်သို့
ဝင်ရောက်ဖြတ်သန်းရေးဆွဲနေသော ကုန်တင် ယာဉ်များအားလုံး ပွဲတော်ကျင်းပမည့် အောက်တိုဘာလ
၂၉ ရက်မှ နိုဝင်ဘာလ ၅ ရက်အတွင်း နေ့စဉ် ညနေ ၄ နာရီမှ နောက်တစ်ရက်နံနက် ၄ နာရီအထိ တောင်ကြီးမြို့တွင်းသို့
ဝင်ရောက်ခွင့် ပိတ်ပင်ထားခြင်း ဖြစ်ကြောင်း သိရသည်။
.
တောင်ကြီး၊ အောက်တိုဘာ ၂၂
.
၂၀၂၅ ခုနှစ်၊ တောင်ကြီးမြို့တော် တန်ဆောင်တိုင်ပွဲတော်
မီးပုံးပျံပြိုင်ပွဲတွင် ကမ္ဘောဇဘဏ်လီမိတက်အုပ်စု နှင့် မိတ်ဖက်ကုမ္ပဏီများက ညမီးကြီးနှင့်
စိန်နားပန်မီးပုံးပျံ စုစုပေါင်း ၂၃ လုံး ပူဇော်လွှတ်တင် ပြိုင်ပွဲဝင် သွားမည်ဖြစ်ကြောင်း
သိရသည်။
.
မီးပုံးပျံပြိုင်ပွဲတွင် ကမ္ဘောဇအုပ်စုအပြင် မိတ်ဖက်ကုမ္ပဏီ၊
လုပ်ငန်းများဖြစ်သော ဆန္ဒမွန်ဆေးရုံ၊ U9၊ ရှမ်းပြည်နယ်တောင်ပိုင်းစက်သုံးဆီအသင်း၊
Cherry Oo၊ Shake Shake Soju တို့က ညမီးကြီးမီးပုံးပျံ
၉ လုံးနှင့် စိန်နားပန်မီးပုံးပျံ ၁၄ လုံး၊ စုစုပေါင်း ၂၃ လုံး လွှတ်တင်ပူဇော်သွားမည်ဖြစ်ကြောင်း
သိရသည်။
.
တောင်ကြီး၊ အောက်တိုဘာ ၂၁
.
ရှမ်းပြည်နယ်တောင်ပိုင်း၊ တောင်ကြီးမြို့နယ်၊ တောင်ကြီး-ဟိုပုံးသွားလမ်း၊
(၈) မိုင်အနီးတွင် ယနေ့ အောက်တိုဘာလ ၂၁ ရက်၊ နေ့လယ်ပိုင်းက လမ်းဘေး၌ရပ်ထားသော ကုန်တင်ယာဉ်ကို
ဆီဘောက်ဆာ ယာဉ်မှ ဝင်ရောက်တိုက်မိပြီး တစ်ဦး သေဆုံးမှု ဖြစ်ပွားခဲ့ကြောင်း သိရသည်။
.
“၈ မိုင် တိုးလ်ဂိတ်မရောက်ခင် နောင်လံဘုန်းကြီးကျောင်းနားမှာ
ဖြစ်တာပါ။ ရှေ့ကရပ်ထားတဲ့ ကုန်ကားကို ဆီဘောက်ဆာက နောက်ကနေ ဝင်တိုက်တာပါ။ တစ်ယောက်သေတယ်လို့
ကြားပါတယ်။ ကားသမား ကတော့ ထွက်ပြေးသွားတယ်” ဟု ဒေသခံတစ်ဦးက ရှမ်းဂေဇက်သို့ ပြောသည်။
.
တောင်ကြီး၊ အောက်တိုဘာ ၂၁
.
ရှမ်းပြည်နယ်မြို့တော် တောင်ကြီးမြို့တွင် လူနေအိမ်ခန်းနှင့်
ဆိုင်ခန်းငှားရမ်းခများ အဆမတန် မြင့်တက် နေပြီး ပုံမှန်ဝင်ငွေရှိ အခြေခံလူတန်းစားများအတွက်ပင်
ငှားရမ်းနေထိုင်ရန် ခက်ခဲနေကြောင်း သိရသည်။
.
“အိမ်ခန်းငှားခတွေက ရန်ကုန်၊ မန္တလေးလို မြို့ကြီးတွေထက်တောင်
ပိုများနေတယ်။ တောင်ကြီးမှာ လမ်းမတန်းလို နေရာမျိုး၊ လမ်းဆုံကြတဲ့နေရာတွေမှာ အခန်းငှားပြီး
ဆိုင်ဖွင့်ဖို့က မလွယ်ဘူးဗျ။ အခန်း ငှားခဈေးတွေက မြင့်လွန်းတယ်။ တော်ရုံတန်ရုံ အစားအသောက်လေး
ရောင်းမယ်ဆိုရုံကတော့ ဆိုင်ခန်းခ ပြန်ရဖို့တောင် မလွယ်ဘူး။ အလုပ်အကိုင်ရှားပါးတော့
တချို့တွေလည်း ဖြစ်မလားဆိုပြီး လုပ်ကြည့်ကြ တာပေါ့။ စာချုပ်တစ်ဖြတ်လောက်ကုန်တာနဲ့
နားကုန်ကြရော။ ဆိုင်ခန်းခအပြင် အခန်းပြင်ဆင်စရိတ်တွေပါ ရှုံးတာပေါ့” ဟု တောင်ကြီးဒေသခံတစ်ဦးက
ပြောသည်။
.
ကျိုင်းတုံ၊ အောက်တိုဘာ ၂၀
.
ရှမ်းပြည်နယ်အရှေ့ပိုင်း၊ ကျိုင်းတုံမြို့တွင် ယမန်နေ့
အောက်တိုဘာလ ၁၉ ရက်၊ ညပိုင်းက လူငယ်များ အုပ်စုဖွဲ့ ဓါးခုတ်မှု ဖြစ်ပွားခဲ့ကြောင်း
သိရသည်။
.
ကျိုင်းတုံမြို့၊ အမှတ် (၄) ရပ်ကွက်၊ ငုဝါလမ်းရှိ
စားသောက်ဆိုင်တစ်ခုတွင် အောက်တိုဘာလ ၁၉ ရက်၊ ညပိုင်းက စားသောက်နေသူ လူငယ် ၃ ဦးကို ယခင်က
ရန်ဖြစ်ခဲ့ဖူးသည့် လူငယ် ၅ ဦးမှ ဓါးဖြင့်ဝင်ရောက် ခုတ်ခဲ့ခြင်းဖြစ်ကြောင်း သိရသည်။
.
တောင်ကြီး၊ အောက်တိုဘာ ၁၉
.
၂၀၂၅ ခုနှစ်၊ တောင်ကြီးမြို့တော်
တန်ဆောင်တိုင်ပွဲတော် မီးပုံးပျံပြိုင်ပွဲ၊ နေ့လွှတ်အရုပ် မီးပုံးပျံပြိုင်ပွဲများကို
ဖွင့်ပွဲမတိုင်မီ ၂ ရက်ကြိုတင်၍ အောက်တိုဘာလ ၂၇ ရက်တွင် စတင်လွှတ်တင် ယှဉ်ပြိုင်သွားမည်
ဖြစ်ကြောင်း သိရသည်။
.
ယခုနှစ် တောင်ကြီးမြို့တော်
တန်ဆောင်တိုင်ပွဲတော် မီးပုံးပျံပြိုင်ပွဲ၊ ဖွင့်ပွဲကို အောက်တိုဘာလ ၂၉ ရက်တွင် ပြုလုပ်သွားမည်ဖြစ်ပြီး
နေ့လွှတ်မီးပုံးပျံပြိုင်ပွဲကိုမူ ၂ ရက်ကြိုတင်၍ အောက်တိုဘာလ ၂၇ ရက်တွင် စတင် ကျင်းပခြင်းဖြစ်ကြောင်း
သိရသည်။
.
တောင်ကြီး၊ အောက်တိုဘာ ၁၈
.
တောင်ကြီးမြို့ပေါ်ရှိ ပြည်သူများကြားတွင် တရားဝင်သဖွယ်
ဖြစ်လာနေသည့် အွန်လိုင်းဘောလုံး လောင်း ကစားဂိမ်းများနှင့် စလော့ဂိမ်းဆော့ကစားသူများပြားလာနေပြီး
နောက်ဆက်တွဲ ဆိုးကျိုးအနေဖြင့် ပစ္စည်း ခိုးယူမှုနှင့် လုယက်မှုများ မကြာခဏ ဖြစ်ပေါ်နေကြောင်း
ဒေသခံများထံက သိရသည်။
.
အွန်လိုင်းလောင်းကစားဂိမ်း လုပ်ကိုင်သူအချို့သည်
တောင်ကြီးမြို့ပေါ်ရှိ လူစည်ကားရာ နေရာများနှင့် အမျိုးသားအများစုရှိတတ်သည့် ဆိုင်ကယ်ကယ်ရီဂိတ်များတွင်
လောင်းကစားနှင့် ပတ်သက်သည့် ဆွဲဆောင် စည်းရုံးမှုများ လိုက်လံပြုလုပ်နေကြောင်း ဆိုင်ကယ်ကယ်ရီမောင်းနှင်သူ
အချို့ထံက သိရသည်။
.
တောင်ကြီး၊ အောက်တိုဘာ ၁၈
.
ရှမ်းပြည်နယ်တောင်ပိုင်း၊ တောင်ကြီးမြို့တွင် အောက်တိုဘာလ ၁၆ ရက်၊ ညပိုင်းက တွေ့ရှိခဲ့သော အမျိုးသားအလောင်းနှင့် ပတ်သက်၍ ကျူးလွန်သူကို ဖမ်းဆီးရမိထားပြီ ဖြစ်ကြောင်း သိရသည်။
.
.
တောင်ကြီးမြို့၊ မြိုမရပ်ကွက်၊
စဝ်စံထွန်းလမ်းတွင် အောက်တိုဘာလ ၁၆ ရက်၊ ညပိုင်းက အမည်မသိ အမျိုးသားအလောင်းတစ်လောင်း
တွေ့ရှိခဲ့ခြင်းဖြစ်ပြီး အဆိုပါ အမျိုးသားမှာ သတ်ဖြတ်စွန့်ပစ်ခံရခြင်း မဟုတ်ဘဲ ကားဖြင့်ချိတ်ပါသေဆုံးခဲ့ခြင်းသာဖြစ်သည်ဟု
သိရသည်။
.
အောင်ပန်း၊ အောက်တိုဘာ ၁၇
.
ရှမ်းပြည်နယ်တောင်ပိုင်း၊ ကလောမြို့နယ်၊ အောင်ပန်းမြို့တွင်
ယနေ့ အောက်တိုဘာလ ၁၇ ရက်၊ နံနက်ပိုင်းက သက်လတ်ပိုင်းအရွယ် အမျိုးသားတစ်ဦး၏ ရုပ်အလောင်းကို
တွေ့ရှိခဲ့ရကြောင်း သိရသည်။
.
သေဆုံးသူမှာ အောင်ပန်းမြို့၊ ညောင်ပင်ထောင်ရပ်ကွက်နေ
အသက် ၂၅ နှစ်အရွယ်ခန့်ရှိ အမျိုးသားဖြစ်ပြီး ၎င်းသည် လွန်ခဲ့သည့် ၃ ရက်ခန့်ကတည်းက ပျောက်ဆုံးနေခြင်းဖြစ်ကာ
ယနေ့ အောက်တိုဘာလ ၁၇ ရက်၊ နံနက်ပိုင်းတွင် မင်္ဂလာကန်အတွင်း ပြင်ပဒဏ်ရာ မတွေ့ရဘဲ ပုပ်ပွလျက်
ပြန်လည်တွေ့ရှိခဲ့ခြင်းဖြစ်ကြောင်း သိရသည်။
.
တောင်ကြီး၊ အောက်တိုဘာ ၁၇
.
ရှမ်းပြည်နယ်တောင်ပိုင်း၊ တောင်ကြီးမြို့၊ မြို့မရပ်ကွက်၊
စဝ်စံထွန်းလမ်းတွင် ယမန်နေ့ အောက်တိုဘာလ ၁၆ ရက်၊ ညပိုင်းက စွန့်ပစ်ခံထားရသော အမျိုးသားအလောင်းတစ်လောင်း
တွေ့ရှိခဲ့ကြောင်း သိရသည်။
.
သေဆုံးသူ၏ ရုပ်အလောင်းတွင် မီးလောင်ဒဏ်ရာနှင့် ကြိုးချည်ဒဏ်ရာများ
တွေ့ရှိရပြီး မည်သူမည်ဝါဟု မသိရှိရသေးကြောင်း သိရသည်။
.
ကလော၊ အောက်တိုဘာ ၁၆
.
၂၀၂၅ ခုနှစ်၊ အကြိမ် (၂၀) မြောက် ကလောမြို့
မြို့လုံးကျွတ်မဟာတန်ဆောင်တိုင် ရိုးရာမီးရှော်တိုင်နှင့်
မီးကြာစံထွန်းညှိပူဇော်ပွဲကို လာမည့် နိုဝင်ဘာလ ၅ ရက်တွင် စတင်ကျင်းပသွားမည်ဖြစ်ကြောင်း
သိရသည်။
.
အဆိုပါ မီးရှော်တိုင်ပြိုင်ပွဲတွင် ကလောမြို့ပေါ်
၁၁ ရပ်ကွက်နှင့် ရပ်ကွက်၊ ကျေးရွာများမှ ပြိုင်ပွဲဝင် မီးရှော်တိုင် အသင်း ၂၁ သင်း
ပါဝင်ယှဉ်ပြိုင် ပူဇော်သွားမည်ဖြစ်ကြောင်း သိရသည်။
.
တောင်ကြီး၊ အောက်တိုဘာ ၁၆
.
ရှမ်းပြည်နယ်တောင်ပိုင်း၊ တောင်ကြီးမြို့တွင်
ယခုရက်ပိုင်းအတွင်း ပုံစံမျိုးစုံဖြင့် ဆိုင်ကယ် အပါအဝင်
ပစ္စည်းခိုးယူလုယက်မှုများ မကြာခဏ ဖြစ်ပွားနေကြောင်း သိရသည်။
.
“အခုက ဖြစ်တာ အစုံပါပဲ။ ဆိုင်ကယ်လုတယ်၊
ပိုက်ဆံအိတ်လုတယ်၊ မီးကြိုးခိုးဖြတ်တယ် အစုံကိုကြားနေရ တာပဲ။ သီတင်းကျွတ်၊
တန်ဆောင်တိုင်ကာလ လူစည်ကားတဲ့အချိန်ဆိုတော့ ပိုသတိထားဖို့ လိုတာပေါ့” ဟု တောင်ကြီး
ဒေသခံတစ်ဦးက ပြောသည်။
.
ဟိုပုံး၊ အောက်တိုဘာ ၁၅
.
ပအိုဝ်းကိုယ်ပိုင်အုပ်ချူပ်ခွင့်ရဒေသ၊ ဟိုပုံးမြို့တွင်
၁၃၈၇ ခုနှစ်၊ ဟိုပုံးတန်ဆောင်တိုင်ပွဲတော် မီးထွန်းပွဲကို တန်ဆောင်မုန်းလဆုတ် ၄ ရက်
(၈-၁၁-၂၀၂၅) မှ တန်ဆောင်မုန်းလဆုတ် ၈ ရက် (၁၂-၁၁-၂၀၂၅) ရက်နေ့အထိ ကျင်းပြုလုပ်သွားမည်ဖြစ်ကြောင်း
သိရသည်။
.
မီးထွန်းပွဲတော်တွင် နှစ်စဉ်ကျင်းပမြဲအတိုင်း မီးပုံးပျံပြိုင်ပွဲကိုလည်း
ထည့်သွင်းကျင်းပသွားမည်ဖြစ်ပြီး ယှဉ်ပြိုင်လိုသော မီးပုံးပျံအဖွဲ့များအနေဖြင့် ဘုရားကြီးဂေါပကအဖွဲ့ရုံးးထံသို့
လာရောက်စာရင်းပေးသွင်း နိုင်ကြောင်း သိရသည်။
.
တောင်ကြီး၊ အောက်တိုဘာ ၁၅
.
တောင်ကြီးမြို့၊ ကျောင်းကြီးစုရပ်ကွက်ရှိ ဂနိုင်ကန်
အမှတ် (၁)၊ (၂) နှင့် (၃) အတွင်း စားသောက်ဆိုင် အဆောက်အဦများ ဆောက်လုပ်မည့် ကိစ္စကို
ပယ်ဖျက်လိုက်ကြောင်း Living Earth Green Network Taunggyi
၏ လူမှုကွန်ရက်စာမျက်နှာတွင် ဖော်ပြထားသည်။
.
“ဟုတ်ပါတယ်။ ဂနိုင်ကန်က သဘာဝအတိုင်းပဲ ထိန်းသိမ်းထားရမယ့်ကန်ပေါ့။
သူက ရေထွက်တာလည်း သိပ်အများကြီး မရှိဘူး။ မိုးရာသီမှသာ တောင်ကျရေတွေနဲ့ ရေပြည့်တဲ့
ကန်မျိုးပါ။ မြောက်ဘက်ဆုံးမှာရှိတဲ့ ကန်က မြို့ထဲကို ရေပေးဝေနေတဲ့ ကန်ဖြစ်တော့ ဂေဟစနစ်တွေ
မပျက်သွားအောင် ထိန်းသိမ်းတာပါ။ ထိန်းသိမ်းထားဖို့ တကယ်လိုအပ်တဲ့ ရေကန်ဖြစ်လို့ သဘာဝပတ်ဝန်းကျင်ထိန်းသိမ်းရေးအဖွဲ့တွေနဲ့
မြို့ခံ တွေက ကန့်ကွက်တော့ မလုပ်ဖြစ်တော့တာပေါ့။ သူတို့ (အစိုးရ၊ တာဝန်ရှိသူ) ဘက်ကလည်း
ပြန်သုံးသပ် တာပေါ့” ဟု Living Earth Green Network (ရှင်သန်ကမ္ဘာမြေအစိမ်းရောင်ကွန်ရက်)
မှ ဒေါ်ချယ်ရီကျော် က ရှမ်းဂေဇက်သို့ ပြောသည်။
.
ဂနိုင်ကန်သာယာ ပြင်ဆင်ခြင်း လုပ်ငန်းများအဖြစ် ကန်ပတ်လမ်း
ပြုပြင်ခြင်း၊ ပန်းလှပင်များ စိုက်ပျိုးခြင်း တို့ကို ယခင်နှစ် ၂၀၂၄ ခုနှစ်အတွင်းက
လွိုင်ခမ်းကုမ္ပဏီမှ ဆောင်ရွက်ပေးခဲ့ခြင်းဖြစ်ပြီး ယခုနှစ်တွင် တောင်ကြီးမြကန်သာ ရေကန်ကဲ့သို့
စားသောက်ဆိုင်တန်းများ၊ အဆောက်အဦများ ဆောက်လုပ်သွားမည် ဖြစ်ကြောင်း သတင်းများ ထွက်ပေါ်လာခဲ့ခြင်းဖြစ်သည်။
.
တောင်ကြီး၊ အောက်တိုဘာ ၁၄
.
ယခု ၂၀၂၅ ခုနှစ်၊ တောင်ကြီးမြို့တော် တန်ဆောင်တိုင်ပွဲတော်
မီးပုံးပျံပြိုင်ပွဲတွင် ပြိုင်ပွဲဝင် ညမီးကြီးနှင့် စိန်နားပန် မီးပုံးပျံ စုစုပေါင်း
အလုံးရေ ၈၀ ကျော် ပါဝင်လာနိုင်ကြောင်း သိရသည်။
.
ထို့အပြင် ယခုနှစ်တွင် ယခင်နှစ်က ဝင်ရောက်ယှဉ်ပြိုင်ခွင့်
မပြုခဲ့သည့် ယမ်းပိသာချိန် ၄၀ ပါဝင်သော ၂၅ ပေ အရွယ် ညမီးကြီးပြိုင်ပွဲဝင်မီးပုံးပျံများလည်း
ပါဝင်လာမည်ဖြစ်ကြောင်းကြောင်း သိရသည်။
